Silva destacou o programa "Practicum Depo" coma medio útil para que mozos e mozas teñan máis oportunidades de futuro
Un total de 46 estudantes de Formación Profesional da provincia participaron en Pontevedra nunha xornada de formación previa ás súas estadías formativas no estranxeiro
A presidenta da Deputación de Pontevedra, Carmela Silva, participou esta mañá, no Edificio Administrativo da Deputación, nunha xornada de presentación e formación sobre o Programa Erasmus+ "Practicum Depo 2015" para 46 mozos e mozas que van iniciar en outubro as súas estadías formativas no estranxeiro. Silva salientou a importancia deste programa formativo "que pretende que sumemos máis medios útiles para que a xente moza teña máis oportunidades de futuro".
Carmela Silva lembroulles ademais aos mozos e mozas que, dende a Deputación, agardan que "estas estadías fóra sexan unha experiencia moi positiva que vos sirva para ter máis fortalezas en todos os sentidos, profesionais e persoais, para o día de mañá poder acceder mellor ao mundo laboral". A presidenta destacou que outros estudantes que xa regresaron das súas mobilidades están valorando moi positivamente a iniciativa, que está logrando así cumprir todos os seus obxectivos: coñecer novas realidades, ter unha visión máis global do mundo, formarse de forma práctica no ámbito que xa teñen formación teórica e practicar novos idiomas e habilidades lingüísticas.
Silva aproveitou para reivindicar tamén o papel dos mestres e mestras neste programa de "Practicum Depo" e en moitos outros proxectos que moitas veces se alonxan da súa actividade especificamente académica. "Isto significa para os mestres e mestras máis traballo, máis implicación e tamén certo risco, xa que sacamos aos rapaces e rapazas do seu ámbito para levalos a algo totalmente distinto, pero iniciativas coma esta reforzan e reivindican o seu papel coma servidores públicos", explicou.
Na xornada formativa en Pontevedra participaron 46 mozos e mozas que van iniciar en outubro a terceira mobilidade do Programa Erasmus+ "Practicum Depo 2015". Durante toda a mañá recibiron a preparación sobre distintos aspectos desta iniciativa, como dereitos e deberes, trámites, coberturas e temas sanitarios.
Todos e todas son estudantes de formación profesional que, grazas a este programa, van pasar seis meses facendo prácticas formativas en Italia, Reino Unido e Irlanda. Esta xa é a terceira quenda de mobilidade, da que xa están gozando tamén outros 10 mozos e mozas que comezaron as súas estadías en Irlanda a principios de setembro. Na segunda mobilidade participan 26 estudantes, que aínda rematan as súas estadías o próximo mes de novembro. A primeira mobilidade foi para 41 estudantes. En total, con esta iniciativa, un total de 123 estudantes de formación profesional da provincia realizan prácticas formativas no estranxeiro.
Estes 46 mozos e mozas proveñen de doce especialidades distintas de formación profesional. Comezarán as súas estadías a principios de outubro: 29 en Italia, 16 no Reino Unido e 1 en Irlanda. Case todos e todas esgotarán a duración máxima das prácticas, que é de seis meses e medio, e polo tanto volverán en abril de 2017. Contan cunha axuda para gastos de viaxe e outra de apoio individual para gastos de aloxamento, manutención e transporte local, sempre en función do destino e do período de estancia.
"Practicum Depo 2015" enmárcase no programa europeo Erasmus+. Supón unha grande oportunidade para que alumnado de formación profesional poida realizar prácticas formativas no estranxeiro, mellorando así as súas competencias vinculadas ao seu perfil profesional e tamén as súas competencias lingüísticas nunha lingua estranxeira.