Silleda acolle a exposición "De Pontevedra a Río 2016" en homenaxe ás e aos deportistas da provincia que participaron nos últimos Xogos
A mostra, que inaugurará a deputada de Deportes, Chelo Besada, permanecerá aberta ata o día 26 deste mes na casa da cultura da vila
A casa da cultura de Silleda acolle desde este xoves 16 de febreiro "De Pontevedra a Río 2016", a exposición fotográfica da Deputación de Pontevedra coa que a institución provincial quere renderlles homenaxe ás e aos deportistas olímpicos e paraolímpicos da provincia que participaron na última edición tanto dos Xogos Olímpicos coma dos Xogos Paraolímpicos. A mostra inaugurarase ás 12:00 horas pola deputada de Deportes, Chelo Besada, acompañada polo alcalde, Manuel Cuíña, na casa da cultura de Silleda, e poderase visitar neste espazo público ata o vindeiro domingo 26.
Silleda acolle esta mostra itinerante, que comezou no Pazo provincial o pasado mes de outubro e que está a percorrer diversas localidades da provincia coma Tui, Cambados, Nigrán, Sanxenxo, Lalín ou As Neves, que xa acolleron unha exposición que realizará arredor doutras 20 paradas ao longo de todo o ano. No concello de Silleda permanecerá exposta ata o domingo 26 de febreiro; o horario de visitas é todos os días, de 11:00 a 14:00 horas, pola mañá, e de 16:30 a 20:30 horas, pola tarde.
"De Pontevedra a Río 2016" recolle o palmarés das e dos 16 deportistas olímpicos e paraolímpicos da provincia de Pontevedra nuns paneis individuais nos que se poden comprobar as súas traxectorias deportivas. Os 16 de "Río 2016" son Fernando Alarza Vicente, Juan Antonio Saavedra Reinaldo, Fernando Echávarri Erasun, María Bernabey Avomo, Támara Echegoyen Domínguez, Sebastián Rodríguez Veloso, Rodrigo Germade Barreiro, Marín de la Puente Riobó, María Teresa Portela Rivas, César Neira Pérez, Óscar Carrera Amandi, Gustavo Nieves Campello, Frank Casañas Hernández, Agustín Alejos Alonso, Jean Marie Okutu Kouletio e Susana Rodríguez Gacio.
