Rodeiro recibe outros 50.000 euros do Plan Concellos para obras de acceso e pavimentación das estradas
A Deputación de Pontevedra leva entregado o 32 % do total destinado a Rodeiro dentro do plan, un investimento superior aos 150.000 euros
O Goberno provincial de Carmela Silva acaba de aprobar, a través dunha Resolución presidencial, unha nova achega ao Concello de Rodeiro ao abeiro da liña 1 de Investimentos do Plan Concellos 2017. Deste xeito, Rodeiro poderá facer fronte ás obras de acceso aos núcleos de Saa, Fafián e Vilaxuste e, ademais, ás obras de pavimentación da estrada municipal que une os puntos de Caraboentes e Mesón de Augalevada.
Con anterioridade, Rodeiro xa recibira a cantidade de 20.554,91 euros que permitirán que sete persoas desenvolvan as súas profesións nos servizos municipais da localidade, a través da liña 3 de Emprego do plan.
Grazas a esta nova achega, a localidade de Rodeiro xa leva aprobado o 31,6 % do total de investimento que recibe dentro do Plan Concellos 2017, isto é, 160.947,24 € dun total de máis de 500.000 euros.
