Pontevedra inicia o despregue de 8.000 composteiros individuais e convértese na cidade mellor preparada do Estado para cumprir a normativa europea de residuos

O vicepresidente César Mosquera, o alcalde Fernández Lores, e o presidente de FRUGA asinaron hoxe un convenio de colaboración para a implantación e seguimento da compostaxe individual no municipio

Pontevedra converterase en breve no concello do Estado mellor preparado para cumprir a nova normativa europea de residuos. A primeiros do próximo mes de febreiro e grazas ao Plan Revitaliza da Deputación comezará a repartición de 8.000 composteiros individuais no rural pontevedrés, o que permitirá reciclar todo o lixo orgánico de 15 parroquias e, polo tanto, recuperar máis da metade dos residuos sólidos urbanos tal e como esixe a nova lexislación de cara ao 2020.

O despregue dos 8.000 composteiros comunitarios será unha realidade grazas ao convenio de colaboración asinado hoxe entre a Deputación, o Concello e a Federación Rural Galega (FRUGA) para a implantación e seguimento da compostaxe individual no municipio, no que estiveron presentes o vicepresidente César Mosquera, o alcalde Miguel Anxo Fernández Lores e o presidente do colectivo rural, Xurxo Álvarez.

Segundo explicou Mosquera, o acordo permitirá que persoal técnico da FRUGA organice entre 80 e 120 charlas informativas para explicar á veciñanza como se debe compostar, instale os composteiros, e unha vez estos xa estean en funcionamento desenvolva entre dúas e catro visitas por domicilio para o seu seguimento. Ademais realizarase un control a distancia vía telefónica para atender dúbidas das persoas participantes no plan.

Nas visitas de seguimento a cada vivenda o persoal técnico debe tomar medicións de temperatura do material a compostar, atender o nivel de enchido, e se a humidade ou esponxosidade é a correcta, para despois subir todos os datos á APP do Revitaliza co fin de que se poida facer unha análise e trazabilidade do funcionamento global.

O vicepresidente destacou que para realizar o seguimento dos composteiros individuais a institución provincial achega 400.000 euros. A FRUGA, dixo, foi elixida mediante un procedemento selectivo (a diferencia dos concellos de Vilaboa, As Neves, Mondariz, Mondariz-Balneario e O Grove) debido á complexidade e extensión dos traballos.

Mosquera salientou que nesta primeira fase da compostaxe individual en Pontevedra é preciso asentar as bases de forma sólida e "ser metódicos e rigorosos" para crear unha "cultura da compostaxe ben feita que preme na sociedade". Tamén indicou que a profesionalidade coa que se está a desenvolver o plan da Deputación, moi diferente do que ata o agora se deu en chamar ‘compostaxe individual'. Insistiu en que o Revitaliza é un proxecto pioneiro que xa é referencia no exterior, tanto en cidades do Estado como doutros países que demandan información continua.

Salcedo, Tomeza e Campañó

O alcalde de Pontevedra confirmou que os 8.000 composteiros individuais adquiridos polo Concello comezarán a instalarse a primeiros do mes de febreiro nun despregue que deberá estar finalizado en maio de 2020. As primeiras parroquias nas que se farán charlas explicativas e reparticións serán Salcedo, Tomeza e Campañó, posto que nas dúas primeiras houbo experiencias previas de compostaxe que facilitan o labor, e en Campañó hai demanda veciñal desde que se instalou o centro de compostaxe comunitaria.

Nos meses posteriores continuarase polo resto das parroquias (15 en total) ata dar cobertura á totalidade do rural. Isto desenvolverase, explicou Lores, de forma paralela ao despregue dos composteiros comunitarios na cidade, onde mañá mesmo se inaugurarán novas ampliacións no barrio da Parda (con postos informativos de mañá e tarde), Ponte Boleira e Camiño de Ferro.

"Pontevedra como cidade vai ser a única cidade que está en condicións de cumprir as directivas da Unión Europea que obrigan a recuperar máis do 50 % dos residuos sólidos urbanos. No caso de Pontevedra intentaremos que sexa máis, e iso é imposible facelo se non se recupera a materia orgánica, posto que esta é máis da metade do lixo", apuntou.

Finalmente, o presidente da FRUGA, Xurxo Álvarez, destacou que o seguimento dos composteiros de Pontevedra é un reto para a organización, pero "que non mete medo", posto que a compostaxe leva practicándose moitos anos no rural. Apuntou que se realizará un traballo didáctico coa veciñanza para que composte e así, ademais de obter beneficios para o medio ambiente, se evite o gasto de cartos públicos en trasladar e queimar un material tan pesado como o lixo orgánico.