Pontevedra acollerá en novembro sete novas accións formativas do programa "SmartPeme"
Están dirixidas á adaptación das empresas e proxectos emprendedores da provincia ao novo escenario dixital no que desenvolver as súas actividades
A Deputación de Pontevedra programou para este mes de novembro sete novas accións formativas do programa "SmartPeme" en Pontevedra. Estas sesións están dirixidas á adaptación das empresas e proxectos emprendedores da provincia ao novo escenario dixital no que desenvolver as súas actividades e aproveitar as ferramentas existentes, co obxectivo de aumentar a súa competitividade.
Deste xeito, "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas.
Así, os cursos que se impartirán desde o 5 ata o 26 de novembro serán: Guía de Boas Prácticas para Redes Sociais, que se desenvolverá o martes 5 de novembro de 19 a 21 horas; Optimiza a túa Páxina de Facebook, que será o xoves 7 de novembro de 18 a 21 horas; Como Utilizar Instagram para Promover a túa Empresa, programado para o martes 12 de novembro entre as 19 e as 21 horas; Mide os teus Obxectivos en Redes Sociais: Análise de Estatísticas, que se realizará o xoves 14 entre as 19 e as 21 horas; Crea un Plan de Marketing para a Campaña de Nadal, o martes 19 de novembro de 19 a 21 horas; Apps de Edición: Sácalle Partido ó teu Instagram, que se desenvolverá o 21 de novembro entre as 19 e as 21 horas; e, finalmente, Ferramentas de Marketing Dixital para Empresas Turísticas, que será o martes 26 de novembro de 17 a 19 horas.
A totalidade destes obradoiros será impartida no Edificio Administrativo da Deputación de Pontevedra (avenida Montero Ríos, s/n). As inscricións para tomar parte nas accións formativas pódense facer a través número de teléfono 886 202 020, no correo electrónico info.smartpeme@depo.es ou na páxina web www.smartpeme.depo.gal. Ademais, o programa formativo SmartPeme estrea Twitter (@smartpeme) e Facebook (SmartPeme).
