Ponteareas completa o 100 % do Plan Concellos cunha última achega do Goberno de Carmela Silva de 90.000 euros
Con este último investimento que o concello dedicará a saneamento, Ponteareas recibe este ano máis dun millón de euros do plan, un 3 % máis que no 2016
O Goberno da Deputación de Pontevedra aprobou unha nova achega para Ponteareas por valor de 90.745,88 euros. Con este novo investimento, o concello da comarca do Condado poderá levar a cabo a terceira fase do saneamento das augas da parroquia de San Nicolao de Prado. Con esta achega, Ponteareas xa ten aprobado o 100 % do Plan Concellos 2017, isto é, xa recibiu os 1.144.952,94 euros que lle correspondían este ano, un 3 % máis que no 2016.
Anteriormente, ao abeiro do Plan Concellos 2017, puido poñer en marchar proxectos como a ampliación da rede de auga potable en Queidores (Bugarín), a pavimentación na rúa de Canedo, a mellora e mantemento na rede viaria municipal, a memoria descritiva e valorada da adaptación de espazo no auditorio para locais de reunión, o saneamento das augas fecais da parroquia de Santa Cristina de Bugarín, a instalación dunha estación de bombeo de augas pluviais na parroquia de San Mateo de Oliveira, a reposición de saneamento na avenida de Galicia, a reforma do edificio da escola infantil municipal, actuacións de melloras e mantemento na pavimentación da rede viaria municipal.
Ademais destas actuacións, encadradas na Liña 1, a Deputación de Pontevedra tamén destinou outros 147.261,78 € en liña 2 para o financiamento de gasto corrente e para poñer en marcha actividades como a I Edición da Feira do libro, entre outros, e finalmente, na liña 3 de Emprego, outros 257.614,41 € para a creación de 34 postos de emprego nos diversos servizos municipais do concello.
Con este novo investimento, a Deputación de Pontevedra leva xa aprobadas achegas na provincia por valor de máis de 40 millóns de euros, é dicir, o 97,1 % do plan.
