As persoas aspirantes a persoal funcionario interino do Plan Revitaliza da Deputación de Pontevedra afrontan mañá o seu primeiro exame
Os postos máis disputados son os doce para mestras e mestres composteiros, con 86 persoas candidatas
As persoas aspirantes a persoal funcionario interino do Plan Revitaliza de compostaxe da Deputación de Pontevedra afrontarán mañá o seu primeiro exame –tipo test– no auditorio do Centro Príncipe Felipe. A primeira proba será para seleccionar o persoal técnico en xestión de residuos, que se fará en horario de mañá, e pola tarde será a quenda das persoas aspirantes a mestras e mestres composteiros.
En total son 164 persoas as que aspiran a traballar como persoal funcionario no plan provincial de compostaxe, o que demostra o tirón da convocatoria e o interese sobre este novo sistema de tratamento e xestión do lixo. Os postos máis disputados son os 12 de mestras e mestres composteiros, para os que se presentarán ás probas 86 persoas, se ben as prazas para técnicas e técnicos de lixo son do interese de 67 persoas candidatas.
A xornada de mañá comezará ás 9.30 horas no Centro Príncipe Felipe cun exame tipo test de 90 preguntas para as e os aspirantes a técnica/o de xestión, que deberán contestar en 90 minutos. Xa pola tarde, ás 17.00 horas, será a quenda das e dos candidatos a mestras e mestres composteiros, que deberán contestar a 60 preguntas tipo test en 60 minutos.
Unha vez pasada a primeira proba teórica, as persoas que pasen o corte deberán realizar un ou varios exercicios prácticos –a mediados do mes de maio– nos que demostren ter capacidades para facer fronte a diferentes supostos.
A intención é que o novo persoal funcionario interino –por programa– do Plan Revitaliza estea xa operativo nos diferentes centros de traballo no mes de xuño.
As mestras e mestres composteiros da Deputación terán cualificación C1, darán soporte técnico e participarán activamente nos traballos físicos no proceso da compostaxe comunitaria, resolvendo as dúbidas e os problemas que poidan xurdir durante todas as fases do proceso, da supervisión dos composteiros individuais e tamén do control e da supervisión do funcionamento das plantas de tipo industrial que se poidan instalar no futuro.
As técnicas e técnicos de xestión de residuos municipais e tratamento de biorresiduos (seis prazas de categoría A2) terán múltiples funcións, desde traballos prácticos de campo ata a elaboración de plans de residuos completos para concellos ou mancomunidades, así como labores de coordinación, impulso e xestión de ámbitos complexos dentro do Plan Revitaliza.
Por último, para cubrir o persoal técnico de xestión económico-administrativa (A2) admitíronse 11 persoas candidatas para dúas prazas. Os exames destas probas aínda estar por fixar.
Máis información sobre 0 proceso selectivo en http://www.depo.es/interinidades/diverso-persoal-revitaliza.
