O proxecto Smartpeme da Deputación pecha 2016 cun 25 % máis de asesoramento a empresas que o ano anterior
Atendéronse case 1.400 consultas de persoas emprendedoras e de pequenas e medianas empresas da provincia no ámbito das TIC
No conxunto do ano 2016 o equipo técnico do proxecto Smartpeme da Deputación de Pontevedra asesorou máis de 1.000 empresas, un 25 % máis que o ano anterior. Analizando unicamente a segunda metade de 2016 e comparando os datos co mesmo período de 2015, obsérvase un crecemento dun 85 % no número de empresas asesoradas, o que supón que máis de 550 empresas recibiron asesoramento TIC.
No relativo ás consultas atendidas, no conxunto de 2016 SmartPeme resolveu case 1.400 consultas, ou, o que é o mesmo, unha media de 1,4 consultas por cada empresa asesorada e o 40 % das consultas totais desde o inicio do proxecto como CPAE 2.0 en 2014. O crecemento con respecto a 2015 é dun 100 %, con case 800 consultas resoltas no segundo semestre de 2016 fronte ás pouco máis de 400 atendidas a finais de 2015. Ademais, ao longo do pasado ano máis de 2.600 persoas participaron tanto nos talleres coma nos eventos informativos organizados por SmartPeme para a formación en novas tecnoloxías, que recibiron unha valoración media anual de 4,64 sobre 5, e rexistráronse no proxecto 624 novas empresas.
Smartpeme foi presentado a máis de 400 persoas interesadas desde o mes de outubro. Ademais, o 4 de novembro presentouse a carteira de servizos ante os representantes de medio cento de asociacións empresariais, colexios profesionais e cámaras de comercio da provincia. En SmartPeme preto dun 15 % da xente que usa activamente os servizos que ofrece o programa son persoas emprendedoras; este dato é un reflexo da importancia que teñen na provincia de Pontevedra. Finalmente, os 302 obradoiros de capacitación TIC desenvolvidos en 2016 rexistraron máis de 2.100 asistentes, o que supón un crecemento dun 25 % con respecto a 2015.
Lembramos que o novo proxecto SmartPeme, en palabras da presidenta da Deputación, Carmela Silva, "é un novo modelo de servizo orientado á mellora competitiva das pemes e á procura dunha melloría nas vendas e na eficacia e eficiencia das tarefas, que abre novos campos de actuación e alcanza novos grupos de interese coma os emprendedores, as asociacións empresariais e os axentes de dinamización en concellos". Para isto nas oficinas de SmartPeme no Porriño, Cambados, Pontevedra, Lalín, Ponteareas e Vigo póñense en marcha actividades coma itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as pemes e impulso de novas carteiras de servizos de asesoramento.
