O Plan MÓVESE da Deputación, premiado polo comité técnico do II congreso Iberoamericano de Seguranza Viaria INTER-CISEV
O xurado recoñeceu o plan provincial de calmado de tráfico como o segundo mellor proxecto de entre as 30 comunicacións presentadas oficialmente en Sevilla por institucións e entidades
O Plan de Mobilidade e Velocidade Segura (MÓVESE) da Deputación de Pontevedra acaba de ser premiado polo comité técnico do II Congreso Iberoamericano de Seguranza Viaria INTER-CISEV que finalizou onte en Sevilla. O xurado recoñeceu o plan provincial de calmado de tráfico como o segundo mellor proxecto de entre as 30 comunicacións presentadas oficialmente por institucións e entidades en materia de seguranza viaria. Valorouse que se trata dunha "actuación directa" para evitar a violencia viaria.
Segundo explicou hoxe o deputado de Mobilidade Uxío Benítez, a Deputación de Pontevedra participou no congreso, organizado pola Dirección Xeral de Tráfico e o Instituto Vial Iberoamericano, logo de que o plan fose seleccionado nun conxunto de 30 exposicións de entidades públicas, privadas, centros universitarios e de investigación sobre ideas innovadoras en materia de seguranza viaria de toda Iberoamérica.
"No Congreso faláronse moitas cousas e as autoridades en seguranza viaria de varios países de Latinoamérica (Bolivia, Colombia, Arxentina, Uruguay…) recoñeceron o feito de que a Deputación implementara unha acción directa para mellorar a seguranza viaria. Alí falouse de moitas cousas indirectas: de planificación, educación… que teñen efectos a medio e longo prazo. Pero desde logo, recoñeceron que lles parecía moi interesante esta idea do Plan MÓVESE porque era unha acción directa. E así foi que o comité técnico nos recoñeceu co segundo premio á mellor comunicación que alí se fixo", indicou o responsable provincial.
O Congreso INTER-CISEV prolongouse dende luns ata onte en Sevilla, sendo a exposición da Deputación o martes pola tarde. "Tanto eu como o asesor Xesús Fole volvemos o mesmo día da presentación por cuestións de traballo, mais chamáronnos da organización para anunciarnos que a Deputación e a presentación do Plan MÓVESE fora premiada como segunda mellor comunicación. A resolución do xurado foi onte ao mediodía e, por tanto, non puidemos recoller o premio que alí se entregou, mais enviaron unha imaxe do agasallo do Instituto Vial Iberoamericano, e comunicaron que o enviarán xunto ao diploma certificado á Deputación. Para nós é un recoñecemento ao noso traballo", finalizou Benítez.
Exposición en Sevilla
Na exposición do deputado Uxío Benítez en Sevilla, o nacionalista manifestou que é obriga das e dos administradores poñer todos os medios posibles para evitar a violencia viaria, xa que a sinistralidade nas estradas é a causa evitable e non natural que máis vítimas mortais orixina no mundo. Segundo dixo, o Plan MÓVESE da Deputación é a aposta da Deputación para reducir as vítimas na provincia de Pontevedra mediante elementos físicos de calmado de tráfico.
Benítez asegurou que os gobernos que ata agora acadaron reducir o número de mortes nas estradas conseguírono "dando prioridade á seguridade na xestión da velocidade", xa que o índice de supervivencia en impactos a 30 quilómetros por hora (velocidade máxima marcada nas actuacións do Plan MÓVESE) é radicalmente superior a se a velocidade é de 60 quilómetros por hora. Así mesmo, subliñou que a "única maneira efectiva de baixar a velocidade" é con elementos físicos: redutores de velocidade de vehículos e pasos de peóns sobreelevados, que se teñen demostrado máis eficientes que as multas e os radares, por exemplo. Para a instalación deses elementos, lembrou que está en marcha un investimento de case catro millóns de euros por parte da Deputación, e que está prevista a posta en marcha dunha segunda fase.
