O Goberno de Carmela Silva destina preto de medio millón de euros do Plan Concellos a outros tres concellos para a contratación de 57 persoas
Cangas, A Cañiza e Mos son as vilas que se van beneficiar destas novas achegas da liña 3 do Plan Concellos 2018
A Xunta de Goberno da Deputación de Pontevedra aprobou este luns a oitava relación de concellos que se van beneficiar das achegas da liña 3, para o fomento do emprego para a conservación e funcionamento de bens e servizos municipais, do Plan Concellos 2018. Así, Cangas, A Cañiza e Mos son as localidades que van recibir 466.047,47 euros para a contratación de 57 persoas.
Máis polo miúdo, ao Concello de Cangas destínanse 249.717,58 euros para 31 postos de traballo relacionados coa administración, construción, albanelería, conserxería, xardinería, condución e para traballos forestais..
Á Cañiza, a Deputación de Pontevedra achega 122.361,75 euros para contratar a 18 persoas que ocuparán postos de traballo relacionados coa conserxería, construción, xardinería, condución, albanelería, pintura, fontanería, limpeza, e electricidade.
Por último, a Deputación de Pontevedra destinará a Mos 93.968,14 euros para contratar a 8 persoas que desempeñarán tarefas relacionadas coas obras públicas e xardinería.
Este ano, a liña 3 do Plan Concellos está dotada de 9.540.000 euros, un 2,5 % máis que no 2017. Con estas achegas aos concellos de Cangas, A Cañiza e Mos, xa está concedido o 79 % da liña 3, beneficiando a 49 concellos da provincia e empregando a preto de 875 persoas.
