O Goberno de Carmela Silva destina máis de medio millón de euros a outros catro municipios da provincia a través do Plan Concellos da Deputación
Con estas achegas provinciais Redondela, Sanxenxo e Dozón completan o Plan Concellos deste ano, e Arbo recibe o primeiro investimento de 2019
A Deputación de Pontevedra, en Xunta de Goberno, acaba de aprobar novos investimentos nun total de catro municipios da provincia no marco da liña 1 do vixente Plan Concellos. Trátase dun total de catro partidas por un total de 515.487,84 euros coas que Dozón, Redondela e Sanxenxo pechan o Plan Concellos 2018 e Arbo, que xa o completou, recibe o primeiro investimento con cargo ao Plan de 2019.
Para Sanxenxo, a institución provincial aprobou unha achega de 185.320,11 euros para a execución do Plan de acondicionamento da Casa do Priorato para o seu uso como centro sociocultural. Con esta última partida económica do Plan Concellos, a vila completa así os seus investimentos. Este ano, a través do Plan provincial, o Goberno de Carmela Silva puxo a disposición de Sanxenxo 1.972.572,74 euros, un 76,20 % máis que o ano pasado.
No caso de Redondela, a Deputación deulle o visto a unha partida económica de 181.024,25 euros para financiar os traballos de reparación de patoloxías no Centro de Deportes Acuáticos de Chapela. Esta é a última achega do Plan Concellos deste ano para Redondela que pecha desta maneira os seus investimentos. A través do Plan Concellos, Redondela tiña este ano a súa disposición un total de 2.005.212,11 euros, un 72,85 % máis que en 2017.
Para Dozón, o Goberno provincial autorizou un investimento de 78.598,27 euros para as obras de pavimentación nos camiños de Saa a A Parte, Moi e camiño de Roiriz a Pena do Coto. Trátase da última achega do Plan Concellos deste ano para a localidade que completa así os seus investimentos. Este ano, a través do Plan Provincial, a Deputación de Pontevedra destinou a Dozón 616.010,07 euros, un
73,16 % máis que no exercicio anterior.
Tamén a Xunta de Goberno aprobou unha achega de 70.545,21 euros para Arbo que serán destinados a financiar a mellora do acceso a Paravedra. Este é o primeiro investimento para a localidade con cargo á liña 1 do Plan Concellos 2019, unha vez aberto o pasado 1 de novembro o prazo de presentación de proxectos. Este ano 2018, a través do Plan Concellos, a Deputación de Pontevedra puxo a disposición de Arbo un total de 734.619,17 euros, un 73,44 % máis que no exercicio anterior.
