O Goberno de Carmela Silva destina máis de 2 millóns de euros para a contratación de 217 persoas noutros trece concellos da provincia
A achega, enmarcada na Liña 3 do Plan Concellos 2020, beneficiará os concellos de Caldas de Reis, A Guarda, A Illa de Arousa, Meaño, Moaña, Mondariz-Balneario, Pazos de Borbén, Ponte Caldelas, Ponteareas, O Rosal, Vilaboa, Vilagarcía de Arousa e Vilanova de Arousa
A Xunta de Goberno da Deputación de Pontevedra aprobou a terceira concesión de subvencións do Plan Concellos 2020 correspondentes á Liña 3 de Emprego cunha achega total de 2.011.554,6 euros para trece concellos da provincia. Como explicou a presidenta Carmela Silva, esta consignación permitiralles aos concellos de Caldas de Reis, A Guarda, A Illa de Arousa, Meaño, Moaña, Mondariz-Balneario, Pazos de Borbén, Ponte Caldelas, Ponteareas, O Rosal, Vilaboa, Vilagarcía de Arousa e Vilanova de Arousa contratar un total de 217 traballadoras e traballadores municipais.
"Hai moitos servizos en todos os concellos de menos de 20.000 habitantes que se poden prestar grazas a que a Deputación de Pontevedra pon estes recursos á disposición dos concellos", destacou Silva. As persoas contratadas dedicaranse a traballos de conservación e funcionamento de bens e servizos municipais, e son os propios Concellos os que solicitan os postos que precisan cubrir a través destas subvencións.
Con esta nova achega da Deputación, Caldas de Reis poderá contratar 9 persoas que realizarán tarefas de mantemento de obras públicas, de limpeza, albanelería, condución de maquinaria, oficiais e auxiliares administrativas e administrativos. Pola súa banda, A Guarda empregará 14 persoas para conserxería, axudantes de camión de lixo, limpeza, animación cultural e informática; mentres que A Illa de Arousa contratará 11 traballadoras ou traballadores para facer servizos de axuda no fogar e para servizos múltiples. Ademais, Meaño contará con 14 persoas para conserxería, condución de camión de lixo, monitora e monitor de tempo libre, obras públicas, albanelería, tarefas forestais e limpeza.
No que se refire ao Concello de Moaña, a achega do Plan Concellos permitiralle contratar 30 persoas para realizar tarefas de limpeza, conserxería, albanelería, obras públicas, especialistas en medio ambiente e forestais, xardinería, carpintería, fontanería e electricidade. En Mondariz-Balneario, 10 persoas farán traballos de construción, tarefas forestais e xardinería; mentres que en Pazos de Borbén haberá 13 contratacións de peoas ou peóns para servizos múltiples. Pola súa banda, Ponte Caldelas empregará 12 persoas para realizar tarefas de desbrozado e mantemento de espazos públicos e de reparación e mantemento de infraestruturas municipais.
En canto a Ponteareas, esta liña de axudas permitirá a contratación de 40 persoas que se encargarán de tarefas clínicas, administración, limpeza, medio ambiente, animación sociocultural, educación infantil, obras e vías públicas, turismo, electricidade, cociña, fontanería, albanelería e servizos múltiples. No Rosal, 10 empregadas ou empregados farán traballos de limpeza e recollida de lixo, electricidade, axuda no fogar, manexo de maquinaria forestal e obras. Pola súa banda, Vilaboa contratará 7 persoas que realizarán tarefas forestais, obras públicas e albanelería. No caso de Vilagarcía de Arousa, un total de 36 persoas serán contratadas para facer traballos de administración, animación deportiva, albanelería, tarefas forestais, pintura, electricidade, carpintería, fontanería, peoa soldadora ou peón soldador, conservación de parques urbanos e xardíns, enterradora ou enterrador, recollida de animais, mantemento de instalacións deportivas e condución de retroescavadoras. Por último, o Concello de Vilanova de Arousa empregará 10 persoas que se ocuparán de tarefas de albanelería, carpintería, turismo, técnicas audiovisuais, limpeza, mantemento de edificios e de equipamentos urbanos e mantemento de xardíns.
