O Goberno de Carmela Silva completa o 100 % do orzamento a Sanxenxo ao abeiro do Plan Concellos 2017
A vila do Salnés recibe este ano do programa da Deputación de Pontevedra máis de 1,1 millóns de euros
A Deputación de Pontevedra acaba de aprobar por Resolución presidencial dúas novas achegas ao Concello de Sanxenxo, no marco do Plan Concellos 2017, por valor de 108.399,89 euros dentro da súa liña 1 de Investimentos. Nesta ocasión, a institución provincial, presidida por Carmela Silva, achegará 55.214,55 euros para a pavimentación do vía de acceso á praia de Pragueira e 53.185,34 euros para a pavimentación da vía de acceso á praia de Bascuas.
Coa suma desta nova achega, Sanxenxo recibiu da Deputación de Pontevedra o 100 % do total do investimento que lle corresponde dentro do Plan Concellos 2017, 1.119.511,11 euros.
Ao abeiro do Plan Concellos 2017, anteriormente a institución provincial xa destinara a Sanxenxo outros 691.867,99 € na liña 1 para o subministro de materiais de accesibilidade para as praias e para parques e xardíns, para a adquisición de aseos prefabricados para a praia da Panadeira, un tractor con rozadoira e tres lava-pés, así como para a pavimentación e reparación de vías municipais, para a instalación de colectores, o acondicionamento dun local para o comedor do CEIP Magaláns e a construción da pista polideportiva cuberta no CEIP de Nantes. Á marxe da liña 1, a Deputación de Pontevedra tamén aprobou destinar a Sanxenxo outros 68.491,95 € para a escola municipal de música, as festas patronais de San Xenxo e Santa Rosalía e os programas da Milla Vila de Sanxenxo, Trail Con da Ventureira, Triatlón Concello de Sanxenxo, Verán en Sanxenxo e Entroido. Ademais, o Goberno de Carmela Silva destinou xa a Sanxenxo outros 264.429,98 €, da liña 3 do Plan Concellos 2017, para a contratación de 43 persoas para garantir a correcta prestación dos servizos municipais no concello.
