O Goberno de Carmela Silva aproba máis de 60.000 euros para Nigrán, que chega ao 100 % do Plan Concellos 2017
Esta última achega completa as inversións do plan no concello do Val Miñor que este ano recibe case un millón de euros , un 2,3 % máis que no 2016
A Xunta de Goberno da Deputación de Pontevedra aprobou unha nova achega para o Concello de Nigrán por valor de 62.771,99 euros. Con este novo investimento poderá levar a cabo obras de reordenación da circulación na rúa Caranquexo. Con esta achega, Nigrán xa ten aprobado o 100 % do Plan Concellos 2017, isto é, xa recibiu os 970.010,12 euros que lle correspondían este ano, un 2,36 % máis que no 2016.
Anteriormente, ao abeiro do Plan Concellos 2017, puido adquirir unha parcela para a construción dun almacén municipal, acondicionar as instalacións eléctricas, subministrar a estrutura de aceiro inoxidable da pista multideportiva da Ramallosa, acondicionar a avenida Castelao, construír beirarrúas na rúa San Roque, adquirir o subministro de luminarias para o paseo marítimo de Panxón, mellorar as instalacións na rúa Mariñeiro, acondicionar as instalacións eléctricas, e facer as obras pertinentes de conexión á rede de abastecemento en San Roque.
Ademais destas actuacións, encadradas na Liña 1, a Deputación de Pontevedra tamén destinou outros 76.100 euros en liña 2 para o financiamento de distintas actividades como unha milla solidaria, unha exposición, a festa de San Fiz, ciclos como "Nigrán area" ou "Nigrán jazz", un programa municipal de canguros, o Entroido, unha travesía a nado, o Ano Carlos Casares e probas deportivas, entre outros, e finalmente, na liña 3 de Emprego, outros 218.252,28 euros para a creación de 27 postos de emprego nos diversos servizos municipais do concello.
Con este novo investimento, a Deputación de Pontevedra leva xa aprobadas achegas na provincia por valor de máis de 40 millóns de euros, é dicir, o 97,1 % do plan.
