O Goberno de Carmela Silva adxudica 343 accións formativas do programa "Conectadas 2017"
Mediante este programa, 5.145 persoas poderán beneficiarse de cursos de formación de 35 horas de duración
A presidenta da Deputación de Pontevedra, Carmela Silva, deu a coñecer que o próximo luns a Xunta de Goberno adxudicará as accións formativas do programa "Conectadas 2017" que, este ano, vai executar a UTE formada polas empresas Forox e Marexada por valor de 324.000 euros. En total, se realizarán 343 accións formativas, de 35 horas de duración cada unha, para o mesmo número de entidades espalladas por 60 concellos da provincia.
O programa "Conectadas 2017" está previsto que beneficie, este ano e ao menos, a 5.145 persoas, superando en preto de dous centenares as que asistiron ás accións formativas o ano pasado.
Carmela Silva aproveitou a ocasión para recordar os obxectivos principais do programa, que ten por finalidade a formación básica das mulleres na comunidade para favorecer as relacións interpersoais e o intercambio de experiencias, contribuír a mellorar a súa empregabilidade e o seu mantemento no mercado de traballo e reducir a brecha dixital mediante a utilización da información e das novas tecnoloxías.
A través de "Conectadas 2017" a Deputación de Pontevedra pretende potenciar a participación e a promoción das mulleres e favorecer as relacións interpersoais en igualdade, impulsando accións formativas e incorporando de forma transversal os principios de igualdade, corresponsabilidade e a conciliación da vida persoal, laboral e familiar. Para elo, o programa beneficiará a 343 asociacións, federacións e fundacións sen ánimo de lucro que traballan para promover ás mulleres, apoiar o seu desenvolvemento e actuación, empoderalas, así como impulsar o tecido asociativo e a consecución do obxectivo de igualdade entre mulleres e home.
En total, o programa ofrece oitos bloques de accións formativas: Muller Emprende, con cursos para crear empresas, administrar redes sociais, comercio electrónico, asesoría laboral e coaching; Muller e Cultura, con formación sobre fotografía, pintura, percusión e canto tradicional, teatro e encontro con lectoras; Actualízate, con cursos sobre alfabetización dixital e socializándose coas redes; Coas túas Mans, con formación sobre cestería, traballos en tea, coiro, madeira e outros materiais e costura creativa; Porque ti o Fas, con cursos sobre arte floral, poda, xardinería e horta ecolóxica; Súmate ao Cambio, con formación sobre cociña e alimentación, conservación de alimentos, cociña, tapas e petiscos, pastelería e repostería creativa, iniciación á costura, coidados, mantemento do fogar e xestión doméstica, coida o teu vehículo, bricolaxe e reparacións, reciclaxe e igualdade; Ponte en Forma, con cursos sobre pilates, taichí, ioga, ximnasia, zumba e sendeirismo; e Coidados Persoais, con formación sobre menopausa de forma saudable, coidar coidándonos, relaxación, intelixencia emocional, risoterapia, musicoterapia e obradoiro de mindfulness.
Este ano as accións formativas máis solicitadas pertencen ás áreas de Actualízate, Coas túas Mans, Porque ti o Fas, Súmate ao Cambio, Ponte en Forma e Coidados Persoais. Máis polo miúdo, os máis demandados son os cursos de traballos en tea, coiro, madeira e outros materiais; Zumba; Pilates; Ximnasia de mantemento; Coxiña. Menú diario; Risoterapia; Pastelería e repostería creativa; Cociña e alimentación. Hábitos saudables; Arte floral. Ornamentación; Cestería; Alfabetización dixital II: Internet, correo electrónico; Costura creativa; Teatro e Ioga.
