O Goberno de Carmela Silva abre un punto de atención informativa en Salvaterra de Miño para atender as consultas sobre o proceso de regularización catastral
En colaboración co Concello o servizo de atención ao público está xa a funcionar na Casa de Cultura en horario de 9:30 a 14:30 horas e de 16:00 a 19:00 horas
A Deputación de Pontevedra ten habilitado en Salvaterra de Miño un servizo provisional de atención ao público para que veciñas e veciños do municipio poidan tramitar máis facilmente as súas consultas sobre o procedemento de regularización catastral que se está realizando na actualidade.
Desde onte 26 de xuño, e previsiblemente durante dúas ou tres semanas, haberá na Casa de Cultura de Salvaterra de Miño persoal disposto polo Goberno provincial para atender todas as demandas da veciñanza sobre este proceso. O horario de atención ao público será, polas mañás, de 9:30 a 14:30 horas, e polas tardes, de 16:00 a 19:00 horas.
A Deputación de Pontevedra habilita este servizo despois de que o Concello de Salvaterra de Miño lle solicitase colaboración para atender á cidadanía afectada polo procedemento de regularización catastral. Estimase que por este proceso están afectadas unhas 2.400 persoas. Na xornada de onte, primeiro día de atención ao público, foron atendidas na Casa de Cultura preto de 60 persoas.
