O deputado Carlos Font visita en Rodeiro as obras de acceso a núcleos e de pavimentación de camiños realizadas no marco do "Plan Concellos 2016"
O deputado lembrou que o investimento do Plan neste ano 2017 na vila sitúase en preto de 510.000 €, un 5% máis que o ano anterior, 2 puntos por enriba da media da provincia
O deputado provincial, Carlos López Font, acompañado por varios membros da corporación municipal de Rodeiro, visitou esta mañá algunhas das actuacións desenvolvidas na vila no marco do "Plan Concellos 2016", entre as que se atopan as obras de pavimentación do camiño que transcorre entre A Torre e Laxas. En concreto esta obra, que se encadra dentro dun proxecto de obras de acceso a distintos núcleos e lugares (Corroliño e Saa en Santa Mariña de Poscoso e Outeiro en Guillar) e de pavimentación de varios camiños (os que transcorren entre Suime e Río e o camiño visitado), supuxo un investimento de máis de 59.000 € dentro da liña 1 (investimentos) do "Plan Concellos 2016".
López Font asegurou que "estes son os investimentos que promovemos a través do Plan Concellos, os que son realmente necesarios para a cidadanía porque garanten os seus dereitos máis básicos e que fomentan o bo estado das nosas vilas". Nesta actuación limpáronse as marxes e as cunetas, executáronse os sumidoiros de 40 centímetros para canalizar as augas pluviais, reparáronse as fochancas e realizáronse tanto un triplo tratamento superficial nalgunhas zonas como, ademais, cunetas de formigón e pasos salva-cunetas.
Ademais, dentro desta obra, no núcleo de Corroliño realizouse o acondicionamento de 750 metros do camiño, para o que houbo que demoler o pavimento existente, preparar as superficies, executar a caixa, a base de macádam e un novo pavimento de formigón armado, mellorar o drenaxe superficial e realizar un lombo para o desvío das augas de escorrentía cara a cuneta lateral. No núcleo de Saa procedeuse ao revestimento das cunetas en formigón armado, á súa limpeza e perfilado, á nivelación e limpeza do pavimento e das cunetas e á reconstrución do sumidoiro. Por último, no lugar de Outeiro realizouse o corte do pavimento existente, a preparación da superficie do camiño mediante escarificado do firme e tamén se limpou e executou o pavimento de formigón armado.
Carlos Font lembrou que o "Plan Concellos 2016" destinou a Rodeiro un total de 485.986,61 euros, o que supuxo un 34% máis que durante 2015. Tamén subliñou o deputado que "grazas a este plan, ademais da obra que vimos de visitar hoxe aprobáronse, no marco da liña 1, investimentos para impulsar o aforro enerxético na vila, acondicionar o centro cultural municipal, construír un edificio polivalente para uso asistencial e tamén outras obras de acceso a núcleos e pavimentación de camiños".
O deputado tamén lembrou que "durante o ano 2016 a Deputación de Pontevedra fixo un investimento total de máis de 635.000 euros na vila de Rodeiro, facendo que os veciños e as veciñas deste concello poidan ter unha mellor calidade de vida" e reiterou que "este Goberno provincial seguirá tendo aos pequenos concellos como a súa máxima prioridade, xa que son quen máis necesitan a actuación directa da institución provincial".
