Máis de 200 persoas participarán en tres novas excursións do programa "En ruta coa Depo"
Veciñas e veciños de Vigo realizarán visitas guiadas a lugares e monumentos de especial interese e cun alto valor turístico
O programa "En ruta coa Depo" organiza entre este sábado 15 e o martes 18 de decembro 3 novas excursións nas que participan 216 persoas de Vigo. Estas excursións permitirán ás persoas participantes coñecer novos lugares da provincia de Pontevedra.
Máis polo miúdo, o sábado, 108 persoas do Centro Sociocomunitario de Vigo poderán percorrer o castro de Santa Trega, na Guarda, o Espacio Fortaleza, en Goián (Tomiño), e o conxunto histórico de Tui xunto ao monte Aloia e o Alto dos Cubos. Pola súa banda, 54 persoas da Asociación de Veciños Nosa Terra de Alcabre visitarán o monte do Facho e Cabo Home.
Para rematar, o martes 18 de decembro 54 persoas da Asociación de Xubilados e Pensionistas de Vigo visitarán Silleda podendo coñecer o castro de Toiriz, o mosteiro de San Lourenzo de Carboeiro, a fervenza do río Toxa e escenarios da serie El final del Camino.
"En ruta coa Depo" ten por obxectivo mellorar a participación, a convivencia e a cohesión social dos distintos colectivos sociais da provincia , promovendo a igualdade de oportunidades para os colectivos con diversidade funcional, que antes non podían participar, así como ofrecer alternativas de ocio e tempo de lecer á poboación xuvenil da nosa provincia e promocionar rutas destinadas ás entidades de nais e pais que fomenten a convivencia e o intercambio de experiencias nas que participen activamente as nenas e nenos. O contido do programa consiste en pasar un día de convivencia pola provincia, mediante acompañamento dun guía que conte coa habilitación de guía de turismo especializado de Galicia e inclúe xantar e transporte.
No 2017 participaron na iniciativa "En ruta coa Depo" 17.501 persoas pertencentes a 410 entidades da provincia. Para este 2018 xa foron adxudicadas en total 23.000 prazas, 5.499 máis que o ano anterior.
