Luz verde da Deputación e do concello de Pontevedra ao convenio para a construción do novo vial de acceso ao Gran Montecelo

Carmela Silva: "Esta infraestrutura non so é de vital importancia para a cidade de Pontevedra senón para toda a provincia"

A presidenta da Deputación, Carmela Silva, e o alcalde de Pontevedra, Miguel Anxo Fernández Lores, veñen de asinar o convenio para o "Proxecto de construción. Novo viario de ampliación Hospital Gran Montecelo" que ascende a 1.370.000 € e que serán financiados ao 100% pola institución provincial.  "Esta infraestrutura, de vital importancia non soamente para a cidade de Pontevedra senón para toda a provincia, merece unha partida específica, un esforzo inversor ao marxe dos 2,5 millóns de € que destinamos cada ano a Pontevedra" detallou a presidenta Carmela Silva.  O alcalde Lores, pola súa banda, incidiu en que a nova vía prestará servizo a unha poboación de 280.000 habitantes da área sanitaria de Pontevedra e adiantou que o proxecto, "xa en contratación", estará rematado "entre 2022 e 2023".

"A nova vía beneficiará a unha poboación de 280.000 habitantes da área sanitaria e agardamos rematar a obra entre 2022 e 2023"
_{Miguel Anxo Fernández Lores}

"Neste 2021 –informou Carmela Silva- temos xa prevista unha partida de 700.000 € para este viario e contemplado unha retención de crédito para o 2022 de 670.000 €" que permitirán crear o novo acceso ao Gran Montecelo.  Así, construirase unha nova vía cunha lonxitude aproximada de 830 metros, que actuará como unha variante ao tráfico, facilitando a circulación cara o Hospital e tamén a cidade infantil Príncipe Felipe. Amais melloraranse os accesos rodados e peonís ao equipamento hospitalario, atenderase axeitadamente a demanda de mobilidade e dotarase á zona de novas infraestruturas e servizos urbanos.

 "Hoxe é un día de alegría –asegurou a presidenta-. As Deputacións, que son organismos intermedios, teñen a obriga de apoiar aos concellos, de permitir que estes sexan os que decidan cales son os investimentos a realizar". Carmela Silva, que recordou que no caso dos concellos de menos de 50.000 habitantes os proxectos fináncianse con cargo ao Plan Concellos e con Pontevedra e Vigo a través de convenios, explicou que a comezos deste 2021 o alcalde formulou a demanda de construción "desta nova vía supramunicipal e decidimos facer un esforzo extra, ao marxe dos 2,5 millóns de € que cada ano comprometemos ao concello de Pontevedra, que hoxe se materializa con esta sinatura". Tamén aproveitou  a ocasión para anunciar que na Xunta de Goberno da Deputación deste mesmo venres se aprobarán outros dos convenios con Pontevedra, por valor de 200.000 €, para a mellora e acondicionamento dos parques infantís do CEIP Xunqueira I e do CEIP de Marcón e para o desenvolvemento de actividades culturais, de lecer e de promoción da cidade.

Pola súa banda o alcalde, Miguel Anxo Fernández Lores, amosou sentirse "encantado de poder executar obras e contar coa colaboración da Deputación". Neste eido destacou que as iniciativas que están a impulsar con financiamento da institución provincial supoñen un investimento de "entre 6 e 7 millóns de € e agardamos chegar, ao remate desta lexislatura, aos 10 millóns de €".  Amais, Lores detallou algúns dos convenios asinados, como o de desenvolvemento de actividades no ámbito da educación, saúde, deporte e promoción económica da cidade de Pontevedra, dotado con 165.129 €; da nova vía de interconexión entre a rúa Rosalía de Castro e a Avenida de Marín en Mollavao, que ascende a un millón de euros e "ten xa todos os informes favorables agás Costas do Estado";  do campo de fútbol de Salcedo no que se está a investir máis de 1,6 millóns de € ou a tramitación dun proxecto para o acondicionamento dunha parcela sobre a vía férrea na rúa Doce de Novembro, que ascende ao medio millón de €. Xunto a estas iniciativas, tamén recordou que co apoio económico da Deputación o goberno local adecuou as oficinas da Casa do Concello, nas que investiu máis de 528.000 €, ou a iluminación ornamental das pontes do Lérez, ás que se destinaron 440.000 €. E informou que, do mandato anterior, está xa executada a nova vía cara Monteporreiro e a Casa de Cultura dos Campos e que, na súa maioría, o saneamento das parroquias de Mourente, Bora e dos Gafos.

A recuperación da Xunqueira de Alba

Tanto a presidenta da Deputación como o alcalde de Pontevedra tamén se pronunciaron sobre o traslado do Parque de Maquinaria ao Polígono de Barro e sobre a Imprenta, adiantando que "agardamos ter xa no 2023 todo pechado".  Carmela Silva asegurou que "imos derribar as edificacións do Parque de Maquinaria e da Imprenta porque hai que recuperar a Xunqueira de Alba". Explicou que está xa aprobado o proxecto e "comezaremos en breve unha rexeneración que será total e absoluta". Sobre a Imprenta a presidenta informou que "era un servizo fundamental cando se imprimían os boletíns oficiais provinciais pero hoxe en día son xa dixitais" e explicou que "imos seguir prestando ese servizo; imos manter a Imprenta e destinar todos os recursos que hoxe destinamos, pero sen construír un novo edificio".

Pola súa banda o alcalde detallou que no goberno local estase a "actuar coherentemente. Temos unha posición clara contra o cambio climático e para recuperar ambientalmente os espazos públicos da cidade e as Xunqueiras son fundamentais, son uns activos que temos ao lado dun río saneado e dunha ría que agardamos sanear tamén no futuro". Lores tamén amosou o desexo de que outras institucións como a Xunta ou o  Estado "sigan o exemplo da Deputación de Pontevedra" e "abandonen canto antes" a Xunqueira de Alba.