Lalín acolle este mes de xuño sete novos obradoiros do programa "SmartPeme"
O programa de asesoramento no ámbito das TIC da Deputación de Pontevedra está destinado ás persoas emprendedoras, ás autónomas e ás pemes da provincia
O viveiro de empresas do Polígono Lalín 2000 acollerá durante este mes de xuño sete novos obradoiros ao abeiro da rede TIC impulsada pola Deputación de Pontevedra. "SmartPeme" oferta ás persoas emprendedoras e ás pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man das propias implicadas e implicados e coa colaboración das asociacións de empresarias e empresarios e de mozas e mozos autónomos.
A primeira cita do mes na oficina "SmartPeme" de Lalín terá lugar o próximo martes 5 de xuño ás 19 h co curso Crea o teu Propio Logotipo con Canva. Tras este primeiro obradorio o xoves 7 de xuño ás 17 h impartirase A túa Información Sempre a Man: Almacenamento na Nube. O martes 12 de xuño ás 19 h terá lugar Parte Práctica da Lei de Protección de Datos 2018, RGDP Europeo (retransmisión en vivo). O xoves desa mesma semana, á mesma hora, celebrarase o curso Utiliza Instagram para Promover e Vender os teus Produtos. Seguindo cos cursos do mes de xuño, o luns 18 ás 19 h terá lugar Rentabiliza o teu Perfil Profesional en Facebook e o mércores 20 celebrarase, nesta ocasión no viveiro de empresas da Estrada, o curso Woocommerce II-A Solución para Vender por Internet. Por último, o martes 26 de xuño impartirase o obradoiro Ferramentas de Google para a Promoción de Negocios Locais. A oficina "SmartPeme" de Lalín, no viveiro de empresas situado no Polígono Lalín 2000, atópase na parcela E deste espazo e as inscricións pódense facer no número de teléfono 886 202 020, o correo-e info.smartpeme@depo.es ou en www.smartpeme.depo.es
"SmartPeme" desenvolve este ano novas carteiras de servizos co obxectivo de continuar axudando ás empresas da provincia a ser máis competitivas no contorno económico actual. O programa abre tres novas grandes liñas: o Centro Provincial de Economía Dixital (CPED), no viveiro de empresas de Barro, "SmartPeme Impulsa" e "TurisTIC".
A través do Centro Provincial de Economía Dixital as empresas, persoas autónomas e emprendedoras da provincia poderán coñecer as ferramentas, aplicacións e solucións innovadoras máis relevantes da economía dixital. Para iso, o CPED vaise apoiar nas instalacións do FabLab que a Deputación ten instalado no viveiro de Barro, co obxectivo de posicionarse na vangarda da innovación ao servizo das empresas.
"SmartPeme Impulsa" abre novas vías de asesoramento en materia de innovación, competitividade e internacionalización unindo, deste xeito, os obxectivos das empresas coas máis novas tecnoloxías, procesos e servizos, e preparando ás empresas locais para competir nos mercados internacionais.
Finalmente "TurisTIC" erixirase como o punto de apoio do sector turístico. Este servizo, enmarcado no Plan estratéxico de Turismo Rías Baixas, pretende potenciar o sector a través de axudas ás empresas para adaptarse á contorna dixital, cun enfoque específico para cada colectivo. Adicionalmente, esta liña de "SmartPeme" contará con algunhas iniciativas innovadoras como serán a creación dunha aceleradora para empresas TIC relacionadas co sector turístico e a creación dun congreso sobre o impacto das novas tecnoloxías no sector.
