Lalín acolle este mes de decembro catro novos obradoiros do programa "SmartPeme"
O programa de asesoramento no ámbito das TIC da Deputación de Pontevedra está destinado ás persoas emprendedoras, autónomas e ás pemes da provincia
O Viveiro de Empresas do Polígono Lalín 2000 acolle durante este mes de decembro catro novos obradoiros ao abeiro da rede TIC impulsada pola Deputación de Pontevedra. "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas.
A primeira cita do mes na oficina "SmartPeme" de Lalín terá lugar o martes 11 de decembro ás 19 horas co curso "Xestión da túa empresa: facturación e ferramentas integradas". A seguinte será o xoves 13 de decembro, ás 19 horas, co obradoiro "Crea presentacións profesionais en Prezi". Tras este obradoiro, o martes 18 de decembro ás 19 horas impartirase o curso "Aprende a promocionar a túa empresa con Pinterest". Ademais destes tres cursos, anteriormente, este mércores 5 de decembro, o Viveiro de Empresas da Estrada acollerá o módulo "Guía de boas prácticas para redes sociais". A oficina "SmartPeme" de Lalín, no Viveiro de Empresas situado no Polígono Lalín 2000, atópase na parcela E deste espazo e as inscricións pódense facer no número de teléfono 886 202 020, no correo electrónico info.smartpeme@depo.es ou na páxina web www.smartpeme.depo.es.
"SmartPeme" desenvolve este ano novas carteiras de servizos co obxectivo de continuar axudando ás empresas da provincia a ser máis competitivas na contorna económica actual. O programa abre tres novas grandes liñas: o "Centro Provincial de Economía Dixital" (CPED), no viveiro de empresas de Barro, "SmartPeme Impulsa" e "TurisTIC", o punto de apoio do sector turístico.
