Gondomar recibe máis de 40.000 euros ao abeiro do Plan Concellos 2017 para a adquisición de vehículos destinados aos servizos municipais
A institución provincial leva entregado o 35 % do total destinado a Gondomar dentro do plan, un investimento próximo aos 300.000 euros
A Deputación de Pontevedra acaba de aprobar, a través de sendas resolucións presidenciais, dous novos investimentos para o Concello de Gondomar ao abeiro da liña 1 do Plan Concellos 2017. Trátase, en primeiro lugar, dunha axuda de 24.000 euros para a adquisición dun vehículo para a concellería de Vías e Obras e, ademais, outros 17.545 euros que permitirá ao Concello de Gondomar adquirir unha rozadoira de brazo lateral.
Anteriormente, Gondomar xa recibira outros 39.765,09 euros en liña 2 para distintos gastos correntes e actividades como unha aula de teatro, obradoiros de memoria, de informática de mantemento ou de informática para persoas maiores, un ciclo de cinema, o "Gondoverán" 2017, unha carreira a prol da corresponsabilidade, entre outras, e finalmente outros 211.000,61 euros en liña 3 para a contratación de 21 persoas nos distintos servizos municipais desta vila.
Grazas a esta nova achega, a vila de Gondomar xa leva aprobado o 35,3 % do total de investimento que recibe dentro do Plan Concellos 2017, isto é, 292.310,70 euros dun total de máis de 940.000 euros.
