Forcarei, Cuntis, O Grove, Meis e Barro acollen cinco novas xornadas informativas sobre o servizo de teleasistencia domiciliaria
Quince concellos da provincia de Pontevedra xa solicitaron acoller unha xornada formativa sobre teleasistencia domiciliaria
A Deputación de Pontevedra organiza esta semana cinco novas sesións informativas sobre o servizo de teleasistencia domiciliaria, servizo que a institución provincial financia en colaboración cos concellos que actualmente ten convenio.
As dúas primeiras citas desta semana serán o martes 21 de novembro, chegando a Forcarei e a Cuntis. Na vila do Deza a xornada comezará ás 11:30 horas e terá lugar no salón de actos do concello. Pola súa banda, en Cuntis, organizarase a partir das 17:00 horas no Centro Cultural Roberto Blanco Torres.
O seguinte concello en acoller estas xornadas informativas será O Grove. A charla terá lugar o mércores 22 de novembro na Casa da Cultura e arrancará ás 10:30 horas.
Por último, o xoves 23 de novembro, Meis e Barro acollerán as dúas últimas xornadas informativas da semana. En Meis, a charla comezará ás 10:00 horas no Centro Multiusos Mosteiro e, en Barro, ás 17:00 horas no salón de sesións do concello.
Estas charlas informativas teñen por obxecto dar a coñecer á veciñanza a importancia do servizo para previr situacións de risco. Así, ata o momento foron quince concellos os que solicitaron que se leve a cabo a sesión informativa: Baiona, Barro, Cambados, Cerdedo-Cotobade (un en Cerdedo e outro en Cotobade), Cuntis, Forcarei, O Grove, Meis, Pazos de Borbén, Ribadumia, Salceda de Caselas, Sanxenxo, Tui, Ponte Caldelas e Valga.
O Servizo de teleasistencia domiciliaria da Deputación de Pontevedra ampara na actualidade a un total de 465 persoas, das que preto dun 75 % son mulleres. Esta iniciativa permite a persoas de avanzada idade ou con algún tipo de diversidade funcional manter a súa independencia e continuar vivindo no seu domicilio con tranquilidade e seguridade, coa consecuente mellora na súa calidade de vida que isto implica.
Ante unha situación de emerxencia no fogar, con só pulsar un botón, os e as usuarias reciben asistencia inmediata, 24 horas ao día e 365 días ao ano, mobilizando os recursos necesarios para dar solución ao problema. Isto é posible grazas a un terminal asociado á liña telefónica, que se instala nos domicilios e que permite establecer unha comunicación directa desde calquera punto da casa, similar ao sistema de "mans libres" dos teléfonos móbiles.
Así mesmo, a través do centro de atención deste programa préstanse servizos de apoio inmediato a demandas de angustia, soidade, accidentes domésticos, mobilización de recursos ante situacións de emerxencia sanitaria, persoal ou social, xestiónanse axendas para recordar á persoa usuaria datos importantes sobre toma de medicación ou realización de xestións e tamén se realizan seguimentos permanentes mediante chamadas telefónicas periódicas. O servizo complétase con visitas regulares aos usuarios e usuarias co obxectivo de acompañar a estas persoas e así minimizar o sentimento de soidade e illamento ao que moitas se ven abocadas e xornadas de convivencia.
O obxectivo fundamental do Servizo de teleasistencia é permitir a permanencia das persoas usuarias no seu medio de vida habitual e o contacto permanente co seu entorno socio-familiar, evitando o illamento social, a soidade e asegurando a intervención inmediata ante situacións críticas, o que repercute moi positivamente na calidade de vida destas persoas.
