Eva Vilaverde aposta por cooperar co norte de Portugal en proxectos de desenvolvemento dos usos da camelia
A deputada delegada da Estación Fitopatolóxica Areeiro mantivo esta mañá un encontro de traballo coas entidades organizadoras da XXIII Exposición de Camelias de Porto
"O norte de Portugal e a provincia de Pontevedra compartimos un gran patrimonio botánico e cultural en todo o relativo ao cultivo da camelia, tanto na súa dimensión ornamental e turística como na dimensión produtiva, e todo este bagaxe compartido debe servirnos para avanzar na súa posta en valor, para promocionar e compartir información sobre rutas e xardíns pero tamén para intercambiar experiencias de producións de té e de proxectos de investigación" asegurou a deputada delegada da EFA, Eva Vilaverde, na súa visita á XXIII Exposición de Camelias que esta fin de semana se celebra en Porto e que conta coa participación de 19 produtores e produtoras. A Deputación, que instala por primeira vez un posto nesta mostra, é a única institución de fóra de Portugal participante, ocasión que aproveitou para difundir os proxectos de investigación sobre a camelia que leva a cabo desde a Estación Fitopatolóxica Areeiro. A presenza pontevedresa nesta mostra complétase coa participación, a nivel particular, de tres produtoras do Baixo Miño, dúas procedentes de Tomiño e unha terceira do Porriño.
Ademais dunha selección de camelias procedentes da plantación de Areeiro, no posto da Deputación tamén se amosaron produtos derivados deste cultivo, como son o té e o aceite, co obxecto de poñer en valor todo o traballo de investigación realizado polo equipo técnico da EFA. "Que estean chegando as primeiras colleitas de té galego ao mercado é posible grazas a todo o traballo de investigación previo realizado desde a EFA e á colaboración coas persoas emprendedoras que queren apostar por este tipo de cultivos, feito que debemos valorar moi positivamente nun momento no que as alternativas na actividade agraria son tan imprescindibles, e este encontro tamén nos ten que servir para coñecer as experiencias similares que se están desenvolvemento na zona norte de Portugal e valorar o seu nivel real de desenvolvemento" asegurou Eva Vilaverde no encontro que mantivo coas entidades organizadoras da mostra, a Cámara do Porto e a Asociación Portuguesa das Camelias. Representantes de ambas entidades, o vicepresidente da Cámara do Porto, Filipe Araújo, e a presidenta da Asociación Portuguesa das Camelias, Eduarda Paz, foron as persoas encargadas de amosarlle á deputada provincial os matices da tradición e do patrimonio portugués ao redor deste cultivo.
A cooperación en materia de investigación entre a Deputación de Pontevedra e a Cámara de Porto remóntase a máis de 15 anos, cando técnicas e técnicos da EFA colaboraron no proxecto de estudo e identificación xenética dos cultivares de camelia máis antigos do Xardín Botánico de Porto. Convén lembrar que a chegada da camelia aos primeiros xardíns da Galiza se produce a través do norte de Portugal, polo que o estudo que se comezou no Xardín Botánico de Porto tivo continuidade na identificación dos cultivares centenarios de xardíns da nosa provincia, como son o de Lourizán ou o de Castrelos.
Eva Vilaverde ten previsto participar durante a tarde de hoxe no acto de apertura da XXIII Exposición de Camelias do Porto e na cerimonia de entrega de premios aos mellores cultivares, que terán lugar no Mosteiro de São Bento da Vitória. Posteriormente visitará algunhas das iniciativas complementarias á mostra, como a cerimonia do chá, a ‘cycle flower parade', e o mandala xigante, con preto de 17 metros de diámetro, que se elaborará con camelias e outras flores do Porto.