Esgotadas en 48 horas as prazas para participar na ruta "Os viñedos do castelo"
As persoas participantes nesta novidosa iniciativa da Deputación de Pontevedra achegaranse á historia do castelo de Soutomaior e participarán nun percorrido polos viñedos e nunha cata, ademais de asistir a un espectáculo teatral
Gran acollida á iniciativa da Deputación de Pontevedra "Os viñedos do castelo". En só 48 horas desde a apertura do prazo de inscrición, esgotáronse as prazas para participar nesta novidosa ruta, que combina historia cun percorrido polos viñedos, unha cata e un espectáculo teatral. Deste xeito, esta primeira edición da actividade terá a súa capacidade completa nas distintas sesións que terán lugar os días 20, 21, 27 e 28 de agosto e tan só queda unha soa praza para a cita do 3 de setembro, ás 19 horas.
As persoas participantes na actividade "Os viñedos do castelo", que terá unha duración de 90 minutos, iniciarán o seu periplo cun paseo guiado pola senda dos viñedos de Soutomaior, no decurso do cal explicaranse cuestións relativas ás orixes do viño, á DO Rías Baixas e as súas subzonas (destacando a de Soutomaior), así como sobre os tipos de uvas e o proceso da vendima. A sesión estará impartida por persoal propio de turismo que achegará a experiencia natural do percorrido e, deste xeito, as persoas participantes terán a oportunidade de aprender e coñecer en que consiste o proceso de vendima neste contorno privilexiado, a carón dun castelo medieval e dun Xardín de Excelencia Internacional.
Tralo percorrido polos viñedos, terá lugar unha cata do caldo "Pedro Madruga", que sae das mesmas cepas do castelo de Soutomaior e foi obtido da colleita de 2019 pola adega Quinta das Eiras. E a última parte da degustación estará amenizada por Rosso&Bianco (o dúo cómico formado por David Carrera e Alberto Antelo), que interpretarán a súa peza teatral Albariño Edition, un monográfico sobre o viño albariño desde un punto de vista persoal e ameno. A través desta novidosa iniciativa, a Deputación busca promover o produto local e desenvolver actividades sostibles e respectuosas co medio ambiente, ofrecendo experiencias a carón do patrimonio histórico e natural.
