Digna Rivas acompañou ao alumnado do CPI Aurelio Marcelino Rey de Cuntis na presentación do simbólico mural elaborado co programa "DepoRúARTE"
Os e as estudantes de plástica de cuarto da ESO do centro educativo escolleron como tema central do seu proxecto a lingua galega e as verbas que se están a perder
A deputada de Xuventude e Cohesión Social, Digna Rivas, acudiu este venres ao CIP Aurelio Marcelino Rey García de Cuntis, onde o alumnado participante presentou un novo mural elaborado no marco do proxecto da Deputación de Pontevedra, "DepoRúARTE. Pintando alternativas". O tema elixido polas e polos estudantes para o mural foi a lingua galega, concretamente as palabras que se están a perder.
Nesta iniciativa participaron un total de 19 alumnas e alumnos de plástica de cuarto curso da ESO. Para a elección dos temas centrais do mural, as e os participantes tiveron unha xornada formativa dirixida por Ana Romero e finalmente o mural, titulado A recuperación da lingua, foi elaborado en colaboración coa artista Noemí Núñez. Ademais, á presentación deste mural asistiron o corpo docente e o resto do alumnado do centro.
Este proxecto, que forma parte do programa "DepoRúARTE", arrancou a súa terceira edición en maio pasado e xa pasou polo IES Barral de Ponteareas, polo IES María Soliño de Cangas, polo IES de Meaño, polo IES Chano Piñeiro de Forcarei e polo IES de Barro. Está destinado á mocidade e o obxectivo deste ano é educar na arte urbana á xente máis nova, para que poida diferenciar entre o que é a arte, que está a deixar unha pegada significativa en cidades como Lisboa, Brístol, Lyon ou Nova York, e o que é o vandalismo urbano.
En cada un dos centros que participaron ou van participar neste programa lévanse a cabo varias sesións formativas de debate e reflexión coordinadas polo equipo de traballo en colaboración coas persoas traballadoras dos centros, co obxectivo de ofrecer ao alumnado participante unha formación básica que dote de recursos para identificar e analizar problemáticas sociais co fin de afondar no papel da arte urbana como ferramenta de cambio.
Posteriormente realízase unha xornada de preparación da superficie a intervir no centro escolar (por parte do equipo de traballo), unha xornada de intervención colaborativa na que as alumnas e os alumnos pintan a superficie escollida xunto ao equipo de traballo, e finalmente, o equipo de traballo emprega as xornadas que resulten necesarias para que o mural quede debidamente rematado.
