Deputación e Concello de Pontevedra asinan o primeiro convenio post COVID-19 para a reforma da sede municipal de Michelena
Carmela Silva enmarca o convenio, que financia a Deputación de Pontevedra ao 100 % por máis de medio millón de euros, no respecto pola autonomía local
A presidenta da Deputación de Pontevedra, Carmela Silva, e o alcalde de Pontevedra, Miguel Anxo Fernández Lores, asinaron, nun ambiente de gran cordialidade e entendemento institucional, o convenio polo que a Deputación financia con máis de medio millón de euros as obras de adaptación á "nova normalidade" da sede municipal na rúa de Michelena, 30.
O convenio ten un importe total de 528.619,98 euros que a Deputación achega ao 100 % e contempla dúas obras. En primeiro lugar ampara os traballos de adecuación do andar baixo da sede municipal, onde se sitúa o núcleo principal de atención ao público ao acoller os servizos de Rexistro e Padrón, cun custo de 226.119,98 euros. Dadas as circunstancias, xa foron adxudicadas polo Concello por procedemento de emerxencia. En segundo lugar, destínanse outros 302.500 euros a reforma integral do andar segundo do edificio, onde se sitúa o servizo de Intervención.
Carmela Silva enmarcou os acordos co Concello de Pontevedra, polos que a Deputación acomete os investimentos priorizados pola cidade a través de convenios de colaboración, como unha expresión do respecto pola autonomía local por tódolos concellos da provincia . A presidenta defendeu esta fórmula e cualificouna como "unha gran decisión adoptada a través do protocolo de colaboración que asinamos en 2015, porque hai xente que fala de respecto á autonomía local, pero logo non é certo". Tamén destacou que estas colaboracións institucionais "non só redundan na cidade", porque, engadiu, "Pontevedra exerce un poder de atracción en Galicia, en España e mesmo a nivel internacional". Polo tanto, destacou que este tipo de investimentos "séntanlle ben ao Concello de Pontevedra, pero tamén á nosa provincia". Ademais detívose especialmente para resaltar que estamos diante do primeiro convenio que asina este mandato e tamén o primeiro tralo confinamento derivado da pandemia da COVID-19. Un acordo que segue a senda doutros plasmados no pasado e que permitiron investimentos nos eidos da cultura, educación, patrimonio, equipamentos, espazos públicos e medio ambiente.
Pola súa banda, o alcalde de Pontevedra, Miguel Anxo Fernández Lores, agradeceu a axilidade na tramitación do acordo, toda vez que as obras do andar baixo xa están en marcha e tamén o respecto absoluto da Deputación polas institucións municipais. Aproveitou a súa intervención para anunciar tamén o comezo inminente ou o remate de obras incluídas en convenios anteriores e que atoparon dificultades na execución, así como outras colaboracións futuras para mellorar outros espazos municipais, equipamentos deportivos e seguridade viaria. O rexedor pontevedrés admitiu a súa preocupación pola "inevitable rebaixa" que pode chegar aos orzamentos da Deputación e dos concellos, pola caída dos ingresos a causa do impacto da crise, e desexou que iso non impida acometer actuacións importantes que están pendentes. Diante dun escenario tan incerto como o actual, recalcou, as administracións deben ser "sensatas, responsables e prudentes na xestión dos cartos que son de toda a cidadanía".
