Deputación e Concello de Barro asinan un convenio para a xestión, conservación e mantemento dos servizos de saneamento e abastecemento do polígono
A presidenta destacou que o convenio permite seguir apostando "man con man, polo Polígono, que é un importante foco de desenvolvemento para Barro e toda a provincia"
A presidenta da Deputación de Pontevedra, Carmela Silva, e o alcalde de Barro, Xosé Manuel Fernández Abraldes, asinaron hoxe, no Pazo provincial, un convenio interadministrativo para a xestión, conservación e mantemento dos servizos xerais de saneamento de augas residuais e de abastecemento de auga do Polígono de Barro. "Un importante convenio porque supón que imos seguir traballando para que o Polígono de Barro siga medrando, creando empregos e xerando actividade económica", sinalou a presidenta. Silva resaltou que "hoxe firmamos un convenio administrativo, pero é moito máis cá iso. É un convenio que ten que servir para que Deputación e Concello de Barro sigamos apostando, man con man, polo Polígono, que é un importante foco de desenvolvemento para Barro e para toda a provincia".
Durante a sinatura do convenio, a presidenta provincial quixo poñer en valor a "excelente relación de acordo e colaboración" entre ambas administracións para buscar proxectos que melloren a calidade de vida da veciñanza. No caso do Polígono de Barro, Carmela Silva mostrouse moi satisfeita por ter conseguido, en todo este tempo, "traballar man a man, Deputación e Concello para sacar adiante este Polígono, que non me cansarei de repetir que está nun lugar inmellorable, nun lugar moi atractivo para calquera proxecto. Un polígono, ademais, no que somos capaces de combinar espazos para empresas e espazos de creación para persoas emprendedoras".
Máis polo miúdo, a presidenta da Deputación detallou que, na actualidade, contan con parcelas no Polígono de Barro, empresas como Distribucións Froiz, CAENOR, EDF Solar, Gasóleos Xeve, GESCOGRA, Mariscos Alumar, González Cerqueiro, Frutas Moncho, Hijos de Rivera, José B. González Villaverde, Novas Rías, Rafael Díaz Buceta, BALVALEN, Áridos de Curro, TC Group Atlántico e Estación de Serviz Low Cost. Ademais das parcelas de solo industrial, o Polígono tamén inclúe un centro de servizos de apoio empresarial e o viveiro de empresas da Deputación.
Pola súa banda, o alcalde de Barro destacou "o importante esforzo feito pola Deputación nestes anos para potenciar o Polígono, para crear dinámicas de crecemento e para que o Polígono teña xa todos os servizos operativos". Abraldes resaltou tamén "o trato exquisito con este Goberno provincial, que dende o primeiro momento amosou o máximo respecto pola Administración local". O alcalde expuxo que o convenio hoxe asinado é unha aposta máis para que o Polígono siga medrando "un polígono vivo, máis autofinanciable, para poder crear máis emprego e para poder xerar máis actividade económica".
A Deputación de Pontevedra ten executadas as obras de urbanización do Polígono de Barro, así como as obras de infraestruturas realizadas fóra do ámbito do Polígono relativas á dotación de enerxía eléctrica, abastecemento de auga potable e depuración de augas residuais. Ademais, a institución provincial ten asumido os traballos e custos de mantemento e conservación, tanto da infraestrutura do abastecemento como da rede de saneamento de augas residuais, incluíndo a conservación, vixilancia e mantemento da EDAR e dos pozos de bombeo e da rede de colectores.
A partir deste intre, tal e como establece o convenio asinado hoxe, a Deputación seguirá con estas funcións de conservación e explotación ata o 30 de xuño de 2019. Desde esa data, o Concello de Barro asume a titularidade das infraestruturas, así como as tarefas de conservación e explotación das mesmas, así como tamén das obras de urbanización realizadas. Fíxase tamén que o Goberno provincial colaborará co Concello de Barro na elaboración das ordenanzas fiscais necesarias para o cobro da subministración da auga e o saneamento do Polígono. Desde a Deputación achegarase ademais toda a documentación técnica e administrativa correspondente a todas as infraestruturas, así como se prestará toda a asistencia técnica necesaria en aras a un correcto funcionamento dos servizos de abastecemento e de saneamento.
