Deputación de Pontevedra e Concello de Ponteareas impulsan a posta en valor do Castelo de Sobroso
Goberno provincial e concello colaborarán na celebración dos 900 anos do asedio o castelo onde estaba Urraca I Raiña de Castela e León
A presidenta da Deputación de Pontevedra, Carmela Silva, e o alcalde de Ponteareas, Xosé Represas, acompañados da corporación municipal, visitaron hoxe o castelo de Sobroso para coñecer o avance das obras de adecuación e conservación que se están levando a cabo, grazas ao convenio de colaboración subscrito entre Deputación e Concello.
Ambas administracións amosaron o seu compromiso total e absoluto para continuar na posta en valor do castelo de Sobroso, para o que está en marcha un convenio de colaboración polo que se invisten 315.000 € nas obras de adecuación deste ben de interese cultural. Ademais, a presidenta da Deputación anunciou que na próxima Xunta de Goberno se levará a proposta dun novo convenio para a realización de obras complementarias que recollan certas melloras que non estaban previstas no convenio inicial e que son necesarias para unha boa rehabilitación do castelo.
Carmela Silva destacou que é necesario que Goberno provincial e municipal traballen xuntos nun "proxecto de futuro que faga que o castelo de Sobroso se converta nunha das grandes xoias turísticas, culturais e históricas, non só da comarca do Condado, senón do conxunto da provincia e de Galicia". Lembrou que Sobroso, xunto ao de Soutomaior tamén, "son castelos impresionantes que non teñen nada que envexar aos castelos do val do Loira en Francia que visitan milleiros de persoas". Pero para lograr que isto sexa unha realidade, asegurou que hai que traballar conxuntamente para a súa valorización e impulso.
Nesta liña de traballo conxunto entre Deputación e Concello, a Presidenta tamén explicou que ambas Administracións colaborarán para conmemorar os 900 anos do asedio do castelo de Sobroso por parte da irma e dos fillos de Urraca I, Raiña de Castela e León que se atopaba no seu interior. "Hoxe comprometémonos en que imos traballar xuntos para que eses 900 anos sexan un fito, non só para Ponteareas, senón para toda a comarca e para toda a provincia", asegurou.
Pola súa banda, o alcalde de Ponteareas, Xosé Represas, explicou a importancia deste proxecto complementario de actuacións que se van levar a cabo e que veñen cubrir unha serie de deficiencias que se tiñan detectado no proxecto inicial. "É vital que todos camiñemos da man para lograr recuperar un espazo tan impresionante coma este castelo de Sobroso, que ten que converterse nun espazo de referencia, non só para a nosa vila e a nosa comarca, e non só polo seu gran valor histórico e arquitectónico, senón tamén polo seu valor medioambiental", manifestou Represas para referirse tamén á importante riqueza do contorno de Sobroso, que alberga máis de 60 especies arbóreas autóctonas.
