Depo RúARTE 2017 bota a andar este sábado en Nigrán e achega a dez localidades da provincia actividades de ocio para as mozas e mozos
Carmela Silva subliña a aposta polo Servizo de Cohesión Social e Xuventude co incremento do 7,4 por cento do orzamento para este ano
A presidenta da Deputación de Pontevedra, Carmela Silva, presentou hoxe en rolda de prensa o novo programa Depo RúARTE que achegará propostas de lecer e de cultura urbana a dez localidades da nosa provincia nos próximos meses para a mocidade. Este sábado comeza en Nigrán na praza do Concello entre as 17 e as 20 horas.
Silva recordou que esta iniciativa de ocio e lecer para as mozas e mozos naceu o ano pasado do Servizo de Cohesión Social e Xuventude, que dirixe a deputada Digna Rivas, co fin de ofrecer unha alternativa a mocidade da provincia e que contou con "vinte talleres en distintos concellos da provincia que comprendían música, cociña, deporte, arte urbana, vídeo e un longo etcétera".
A presidenta da Deputación subliñou que tras a experiencia do ano pasado Depo RúARTE foi mellorado para ofrecer unha mellor alternativa para a mocidade pero sempre "cunha compoñente inclusiva para que as mozas e mozos con diversidade funcional tamén poidan participar en todas as actividades". Silva, de feito, destacou que algunhas das monitoras e monitores que acompañarán as persoas participantes conta con algunha diversidade funcional.
Este ano a oferta de Depo RúARTE vai estar concentrada en novos obradoiros nunha mesma xornada entre as 5 e as 8 horas da tarde que terán lugar en dez localidades da provincia ao longo dos próximos meses. De feito comezará por Nigrán, este mesmo sábado na praza do Concello, e continuará en Marín o próximo día 24 de xuño. Outras localidades que acollerán os obradoiros serán A Estrada, Silleda, Caldas de Reis, Vilagarcía de Arousa, Poio, Mondariz, O Porriño e Tui.
Os obradoiros divídense nas iniciativas MúsicARTE, UrbanARTE, CreARTE, que ofrecen a mocidade os coñecementos básicos para a experiencia de creación de música, graffiti e a decoración artística. Calquera moza ou mozo maior de doce anos poderá achegarse ata estas localidades e anotarse para participar nestes talleres.
Así o MúsicARTE ofrece tres obradoiros distintos. O primeiro de Breakdance (coa aprendizaxe das técnicas deste estilo de baile urbano); Turntablism DJ (que é o movemento que realizan os DJ de hip-hop cos vinilos ate adiante e atrás para crear composicións sonoras); e o de Beatbox (que é a creación de música sexan ritmos ou melodías coa boca). UrbanARTE ofrece un obradoiro para a creación e elaboración de pinturas coa base dos graffiti. E CreARTE ofrece un obradoiro para a personalización de gorras mediante debuxos na súa parte frontal.
Precisamente, a presidenta mostrou a súa satisfacción polo traballo desenvolvido pola deputada Digna Rivas á que felicitou polas iniciativas que desenvolve o seu departamento. "Como ben saben, unha das prioridades que nos marcamos ao comezo desta lexislatura polo novo Goberno provincial, foi poñer ás veciñas e veciños de toda a provincia no centro de todas as nosas políticas. Por iso, temos apostado fortemente polo Servizo de Cohesión Social e Xuventude e ano a ano imos incrementando as partidas económicas do servizo. Para o 2017 Cohesión Social e Xuventude dispoñen dun orzamento de máis de 5,5 millóns de euros o que supón un 7,4 por cento máis que no 2016". Todos estes datos e un resumo de todas as actividades do servizo foron presentadas por Carmela Silva nun vídeo que poderá verse nas redes sociais e na web da Deputación.
Por último, a presidenta animou a mocidade da provincia a presentar as súas propostas e ideas aos primeiros Premios Provinciais á Xuventude "xa que queda unha semana para que conclúa o prazo".
Carmela Silva recordou que estes premios están dirixidos a mozas e mozos da provincia de idades comprendidas entre os 16 e os 35 anos e as modalidades de participación son as de iniciativa social (dous premios) e iniciativa empresarial (outros dous premios), para ambos os casos con proxectos de proxección e impacto social que favorezan a igualdade; blogs (tres premios) que promovan a igualdade, a educación en valores, a formación, o asesoramento, as actividades de voluntariado, culturais e/ou deportivas dirixidas á mocidade; educación en valores (dous premios) para proxectos que persigan a consecución da non violencia en todos os ámbitos da vida persoal, familiar e social, así como a prevención do acoso escolar e o ciberacoso; traballo musical (tres premios) para persoas sen contratos discográficos vixentes; traballo literario breve (tres premios) e, por último, fotografía orixinal (tres premios).
