#COVID19 Final feliz para Lara e os seus sete cachorros, rescatados polo CAAN dunha zona de escombros en Crecente
Desde a entrada en vigor do estado de alarma o Centro de Acollida da Armenteira realizou 23 recollidas de animais consideradas de atención necesaria. O centro mantense pechado ao público e as adopcións seguen suspendidas
Lara e os seus sete cachorros xa están a salvo no Centro de Acollida e Protección de Animais da Deputación de Pontevedra. A cadela, abandonada coas súas crías nunha zona de escombros no concello de Crecente, foi rescatada xunto a súa camada polo persoal do CAAN despois de varios días de traballo e paciencia, xa que estaba nunha zona practicamente inaccesible. Lara non tiña posibilidade de acceder a auga e comida para poder aleitar os seus cachorros, polo que corrían risco de falecer. O persoal do CAAN tivo que desprazarse en máis dunha ocasión ao lugar, xa que de primeiras non se puido recoller á nai dada a dificultade de acceso á zona e a que a cadela se mostraba agresiva. Finalmente, grazas a que se fixeron tarefas para retirar os escombros, puideron rescatar os animais, que agora se recuperan no centro da Armenteira. Tanto os cachorros, catro femias e tres machos, coma a nai están en relativo bo estado a pesar das circunstancias. A cadela foi bautizada polo persoal do centro como Lara e os cachorros son Pipa, Pina, Piña e Fina (as femias) e Fino, Fin e Finón (os machos).
Hai que lembrar que o Centro de Acollida e Protección de Animais da Deputación de Pontevedra segue pechado ao público e ten as adopcións suspendidas desde a entrada en vigor do Real decreto do estado de alarma pola COVID-19, pero mantén o seu servizo de lacería para casos de atención necesaria, coma este. Desde o pasado 14 de marzo o CAAN, que sostén a súa actividade de atención e coidado aos 300 cans e cadelas que acolle actualmente, levou a cabo 23 recollidas de animais que se enmarcan nos supostos de atención necesaria: casos con animais feridos ou potencialmente perigosos, animais mantidos en instalacións municipais non habilitadas para o seu coidado, animais libres que poidan causar accidentes ou lesións e actuacións de emerxencia requiridas polo poder xudicial e os corpos e forzas de seguridade.
As recollidas destes días foron realizadas nos concellos de Marín, Caldas de Reis, Redondela, Nigrán (2), Baiona, Meaño, Soutomaior, Meis (2), A Estrada, Mos, Campo Lameiro, Fornelos, A Cañiza e Crecente (8). En cinco casos (Marín, Caldas, Meis, Mos e un en Nigrán) os cans puideron ser devoltos ás e aos seus propietarios. Desde a institución provincial prégaselles ás persoas propietarias de cans que estes días extremen as precaucións ao saír a pasear coas súas mascotas a fin de evitar o extravío dos animais e as consecuentes situacións de risco para eles e para as persoas que poden derivar da situación.
Doutra banda, dentro das medidas adoptadas co estado de alarma, no centro da Armenteira reduciuse a presenza física ao mínimo persoal necesario, que traballa coas medidas hixiénicas e de protección necesarias e respectando as distancias de seguridade en quendas diferenciadas por actividades. Así mesmo, establecéronse servizos indispensables para a limpeza das instalacións e a alimentación e atención veterinaria permanente dos animais.
