"Conectadas 2018", o programa de Igualdade, arrancou esta tarde en Lalín cun curso de ximnasia de mantemento
O deputado Javier Dios acudiu ao primeiro obradoiro no que participan 15 mulleres da Asociación Laxeiro. No ano 2017, 5.500 persoas da provincia participaron en "Conectadas"
O deputado Javier Dios acudiu esta tarde en Lalín ao primeiro obradoiro do programa de Igualdade da Deputación de Pontevedra, "Conectadas 2018". Deste xeito, a terceira edición deste programa arrancou na vila de Deza cun curso de "Ximnasia de mantemento", que será de 35 horas e impartirase os mércores de 18:15 a 19:15 horas. A esta acción formativa asistirán 15 mulleres da Asociación de Amas de Casa Laxeiro.
"Conectadas 2018" é o programa destinado a asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, que apoien o seu desenvolvemento e actuación, o empoderamento das mulleres, ao igual que o seu tecido asociativo, e a paulatina consecución do obxectivo da igualdade de mulleres e homes".
Esta terceira edición conta cun orzamento de 324.000 euros e vanse desenvolver 46 accións formativas distribuídas en 8 bloques temáticos: "Muller emprende: iniciativas sostibles para o emprego", "Muller e cultura: Artes Visuais", "Actualízate", "Coas túas mans", "Porque ti o fas", "Súmate ao cambio", "Ponte en forma" e "Coidados persoais".
No ano 2017 beneficiáronse de "Conectadas" un total de 343 entidades pertencentes a 60 concellos da provincia, o que supuxo preto de 5.500 persoas participantes.