Cheo absoluto nos obradoiros do Depo FabLab, que este xoves comezaron coas prazas esgotadas
Silva destacou "a grande demanda destas accións que sorprendentemente non están a cubrir as administracións que teñen as competencias"
A presidenta da Deputación de Pontevedra, Carmela Silva, anunciou o inicio dos obradoiros do novo espazo Depo FabLab, laboratorio de fabricación dixital que se atopa no espazo de coworking do Edificio de Servizos do Polígono Industrial de Barro. Sobres estes obradoiros, que estenderanse durante todo o mesmo de decembro con todas as prazas esgotadas, Carmela Silva resaltou que "o exitazo desta iniciativa, pois 24 horas despois de abrirse as inscricións xa estaban cubertas a maioría das prazas ofertadas para os sete obradoiros programados".
Depo FabLab busca converterse nun punto de referencia na provincia para as persoas emprendedoras. A súa finalidade é a de atraer proxectos de corte máis innovador e tecnolóxico e tal como apuntou a presidenta da Deputación de Pontevedra "está pensado para que calquera emprendedor ou emprendedora que o precise poida experimentar e prototipar o seu deseño nestas innovadoras instalacións".
O estreo destes obradoiros tivo lugar o pasado xoves 30, cando as 15 persoas que cubriron as prazas ofertadas puideron participar no curso sobre deseño 3D e ferramentas libres para impresión 3D. Os seguintes obradoiros serán: "Deseño 3D con ferramentas libres II e impresión 3D I", o luns 4 de decembro; "Deseño 3D con ferramentas libres III e impresión 3D II" o xoves 7 de decembro; "Arduino con ferramentas libres I", o luns 11; "Arduino con ferramentas libres II", o xoves 14 de decembro; "Arduino con ferramentas libres III", o luns 18 de decembro, e "Creación de proxectos de Arduino e Impresión 3D", o xoves 21.
Todos estes obradoiros teñen unha duración de 3 horas e o aforo total é de 15 persoas, xa que as instalacións contan con 10 postos de traballo. Desta maneira favorécese a aprendizaxe nuns cursos onde impártense coñecementos teóricos e prácticos sobre ferramentas de prototipado rápido, uso e aplicacións da impresión 3D, dixitalización 3D de moldes, revolución do open hardware, integración e aplicacións de sensórica ou aplicacións de robótica.
Para rematar, Carmela Silva resaltou que co éxito destes obradoiros "estamos a observar que había unha grande demanda deste tipo de accións que sorprendentemente non están a cubrir outras administracións que realmente son as competentes en economía".
O FabLab conta con impresoras 3D, escáneres 3D, kits de Arduino, fresadora de madeira, soldadores de electrónica, material electrónico diverso, ferramentas, ordenadores de sobremesa con gran capacidade de procesamento e almacenamento. Ademais, para que se poidan levar a cabo labores experimentais no eido da electrónica e programación, o FabLab tamén contará cun grande número de circuítos integrados (Shield) que permiten conectividade wi-fi, Bluetooth, GPS, 3G, NFC e de sensores de son, temperatura, cor, distancia, presión e humidade.
