Cerdedo destinará 39.000 € do Plan Concellos á adecuación e formación de cunetas
O Goberno provincial xa leva entregado o 53% do Plan Concellos a Cerdedo, o que supón un investimento na vila de 206.406,88 €
A Deputación de Pontevedra, mediante resolución presidencial, vén de aprobar a achega de 39.021,83 € ao concello de Cerdedo con razón da adecuación e formación de cunetas nos viarios do municipio. Esta axuda pertence ao Plan Concellos 2016 e, máis concretamente, á súa liña 1 de investimentos.
Con anterioridade, Cerdedo xa recibira 70.472,21 € en liña 1 para a duplicación de depósitos de auga de Tomonde e Folgoso, outros 14.573 € en liña 3 para o financiamento das actividades "Teatro e Cerdedo" e "Ciclo Musical de Cerdedo" e, en último lugar, 82.339,84 € en liña 4 destinados a financiar a contratación de 11 traballadoras e traballadores nos diversos servizos municipais da vila.
No que levamos de 2016, o Goberno provincial xa entregou o 53,1% do total destinados a esta vila dentro do Plan Concellos 2016, o que supón que neste momento o investimento en Cerdedo acada a cifra de 206.406,88 €.
