A Deputación de Pontevedra súmase este domingo á celebración do Día de Europa
A institución provincial conmemora a data con accións nas redes sociais institucionais e unha proxección durante toda a fin de semana na explanada do Pazo provincial
Cun chamamento "para contribuír todas e todos" ao crecemento dunha Europa máis igualitaria, ecolóxica, cohesionada e dixitalizada "como o mellor instrumento para saír máis fortes desta crise", a Deputación de Pontevedra conmemora esta fin de semana o Día de Europa, que terá lugar este domingo 9 de maio, aniversario da histórica declaración de 1950 de Robert Schuman considerada o xerme da Unión Europea.
"Europa ten que seguir a ser o centro das decisións que garantan dereitos para todas as persoas, non só no territorio europeo senón no conxunto do mundo". Nun audiovisual co que a institución celebrará este día nas redes institucionais, a presidenta, Carmela Silva, fai recoñecemento ao "grande avance que a Unión Europea foi para a humanidade. Permitiunos vivir o período máis longo de paz da nosa historia", recorda, e xuntos e xuntas debemos seguir avanzando cara unha Europa máis xusta na que as persoas sexan o centro de todo". "Ademais, remata a presidenta provincial, nestes últimos meses vimos que somos máis fortes, temos máis recursos e podemos facer fronte ás consecuencias da pandemia grazas á Unión Europea".
Co gallo desta conmemoración, desde a noite do pasado venres e ata o próximo luns, a Deputación está a proxectar na explanada situada fronte ao Pazo provincial de Pontevedra a imaxe da bandeira europea xunto ao lema Día de Europa.
