Case 900 persoas participaron este ano nas "DepoRutas BTT" da Deputación de Pontevedra
O programa pechouse este domingo cunha última etapa pola espectacular Costa da Vela, en Cangas, que esgotou as 300 prazas dispoñibles
A Deputación de Pontevedra pechou este domingo a terceira edición das "DepoRutas BTT", o programa de deporte e turismo sustentable, que este ano contou con cinco rutas en Meis, Silleda, Nigrán, Salceda de Caselas e Cangas, nas que participaron un total de 887 deportistas ao longo dos meses de agosto, setembro e outubro.
Unha espectacular etapa pola Costa da Vela no concello de Cangas foi a ruta final desta edición que esgotou todas as prazas. De feito, trescentas persoas participaron nesta última "Deporuta BTT", á que asistiu a deputado de deportes Gorka Gómez, e que discorreu por un entorno natural privilexiado. O percorrido que realizaron as e os participantes foi circular e tivo como punto de saída e chegada a antiga fábrica de conservas de Massó. As e os ciclistas discorreron os primeiros quilómetros da mesma por sendeiros a pé de mar que os levaron ás praias de Liméns e Nerga. Unha vez superado este espectacular tramo dirixíronse a un entorno incomparable como é a zona de Cabo Home e a praia de Melide, gozando deste xeito dunhas fermosas vistas á ría de Vigo e ás illas Cíes.
O programa "DepoRutas BTT", cuxa terceira edición xa se está a preparar, propón rutas totalmente gratuítas co obxectivo de fomentar o deporte á vez que se pon en valor os montes da provincia e a súa riqueza natural, ecolóxica e patrimonial inigualable. Está dirixido a todas aquelas persoas maiores de 16 anos que gocen do deporte en contacto coa natureza e aposten por actividades sustentables. Amais, a institución provincial pon a disposición de todas as e os participantes a cobertura de seguro de responsabilidade civil e accidentes, servizo sanitario, servizo de asistencia durante o percorrido, dous avituallamentos, servizo de lavado de bicicletas e servizo de vestiarios.
