Carmela Silva subliña como "unha gran noticia" que unha muller sexa a nova subdelegada do Goberno na provincia
A presidenta da Deputación e Ana María Ortiz coinciden en manter unha relación institucional de "matrícula de honra"
A presidenta da Deputación de Pontevedra, Carmela Silva, salientou que espera manter unha relación aínda mellor se cabe coa nova subdelegada do Goberno na provincia, Ana María Ortiz, que hoxe visitou a institución provincial na súa xira de presentación ante as autoridades da provincia.
Carmela Silva subliñou que co anterior subdelegado do Goberno, Antonio Coello, a relación institucional foi de "sobresaínte" e que espera que coa nova subdelegada sexa aínda mellor, "de matrícula de honra", sinalou.
A presidenta da Deputación destacou a importancia de que, por primeira vez na historia, este cargo sexa ocupado por unha muller; "é moi importante que se visibilicen as mulleres en postos de importancia. Para min é unha gran noticia". Silva anunciou a máxima colaboración institucional, que xa estaba alcanzada co anterior subdelegado.
Por outra parte, a presidenta tamén subliñou, como unha das prioridades na que ambas coinciden, a loita contra as violencias machistas, que a propia subdelegada destacou, na súa toma de posesión, como uno dos seus principais traballos na Subdelegación, "máis nestes días, coas cifras que temos nos meses de xaneiro e febreiro", concluíu Silva.
Pola súa banda, Ana María Ortiz mostrouse tamén favorable a manter unha "extraordinaria relación institucional" coa Deputación de Pontevedra e a, desde hoxe, con esta primeira visita, "poñerse ao servizo da presidenta".
