Noticias

Carmela Silva achégase ás "experiencias enriquecedoras" de tres estudantes que gozan no estranxeiro do programa Erasmus+ Practicum Depo

Silva: "Gústame a xente que se atreve a facer cousas e vos sodes persoas novas que ides a unha contorna descoñecida para continuar formándovos"


09 decembro 2020
videoconferencia con tres erasmus do programa

A presidenta da Deputación de Pontevedra, Carmela Silva, realizou hoxe unha teleconferencia con tres estudantes de Formación Profesional que completan os seus estudos con prácticas no estranxeiro no marco do programa Erasmus+ Practicum Depo impulsado pola Deputación co apoio do Ministerio de Universidades. Silva quixo coñecer de primeira man as experiencias da pontevedresa Diana Martínez, que está en Lecce (Italia); Rocío Feliz, unha dominicana asentada en Vigo e que viaxou ata Braga (Portugal) e Manuel Ares, un mozo de Muxía que estudou en Vigo e acaba de regresar da súa estadía en Birgu (Malta).

A charla, na que tamén participou a deputada de Emprego, Raquel Giráldez, serviu para deixar patente a satisfacción persoal e profesional das tres persoas participantes, que afirmaron estar vivindo "experiencias moi enriquecedoras". Carmela Silva destacou que todo o relacionado co programa Erasmus é agora moito máis complicado por mor da pandemia da COVID-19, pero, aínda así, remarcou a importancia de seguir movéndose por Europa para completar a formación e "mergullarse noutro idioma". "Gústame moito a xente que se atreve a facer cousas", afirmou xusto antes de poñer en valor que as e os participantes neste Practicum Depo "sodes xente nova que ides a unha contorna descoñecida". As estudantes e o estudante agradeceron expresamente a Carmela Silva a oportunidade brindada pola Deputación, a presenza nos destinos de persoal supervisor das prácticas e a seguridade que dan as bases do Practicum Depo sobre os labores que deben realizarse durante o período de prácticas.

Durante a charla, que se prolongou durante 45 minutos nun ambiente moi distendido, a presidenta coñeceu detalles sobre o día a día de Diana Martínez Mourinho, que ten 30 anos e reside en Tomeza (Pontevedra) e acaba de rematar o ciclo medio en Xestión Administrativa no IES Luis Seoane. Tamén de Rocío Alejandra Feliz Feliz, que ten 23 anos e orixe dominicana. Estudou na Escola de Deseño Atlántico de Vigo o ciclo medio en Procedementos de Xoiería Artística). E, finalmente, de Manuel Ares Cives, con 25 anos, natural de Muxía, rematou no Instituto Marítimo Pesqueiro de Vigo o ciclo medio en Navegación e Pesca de Litoral).

A aprendizaxe do idioma foi un aspecto especialmente valorado. Neste senso Manuel comentou a súa vivencia desde a aterraxe no aeroporto de La Valeta, cunha primeira impresión que o impulsaba a tomar o voo de volta a unha progresiva integración nun ambiente anglofalante, o que lle permitiu pasar dun nivel "A-2 escaso" a un B-1, "case, case B-2". "Agora síntome maduro falando en inglés", explicou. Ao mesmo tempo explicou que, trala súa formación académica, relacionada co mundo da pesca, non se decatara das posibilidades empresariais que ten o sector dos iates de recreo "que viamos como cousas de "domingueiros", e agora teño claro que é un nicho de negocio que pode traerse a Galicia". Rocío, pola súa banda, indicou que non tiña "nin idea de portugués e aprendín moitísimo en pouco tempo". Distintas foron as cousas para Diana, quen xa tiña cursado estudos de italiano na Escola de Idiomas en Pontevedra e agora ten a sorte de convivir con catro mozas italianas que tamén aprenden español "así que nos corriximos mutuamente". A moza pontevedresa falou da súa adaptación ao traballo nunha empresa de Lecce, onde leva mes e medio. Así explicou que ao principio encargáronlle traballos de redacción que non se axustaban exactamente ao perfil dunha xestora administrativa como ela: "o meu son os números", recalcou. Cousa que tivo ocasión de deixar clara en canto caeu o primeiro cadro económico nas súas mans e decatouse dalgúns erros contables que demostrou, con seguridade, diante do seu responsable directo. "Tu sei molto brava!" (És moi boa), lle dixo. Desde entón realiza funcións máis axeitadas.

O programa Practicum Depo ten por obxectivo completar a formación de estudantes graduados/as de Formación Profesional de ciclos medios con prácticas laborais en empresas e institucións europeas, para facilitar a súa inserción laboral. Nestes momentos as mobilidades que están en curso son as do Practicum Depo 2019 no que están a participar 92 estudantes e 10 docentes. Cinco deles atópanse neste intre en Escocia e Portugal (regresan a mediados de xaneiro) e outro grupo de 14 está a realizar a súa estancia en Italia, Portugal e Irlanda (vén de comezar a súa estancia). A última mobilidade do programa (a sexta) comezará en xaneiro.

A Deputación está tramitando o Practicum Depo 2020, cun orzamento de 734.027 €. Arrancará en 2021 e fará posibles 96 mobilidades de alumnado en países da Unión Europea (Irlanda, Italia, Portugal, Malta, Alemaña, Grecia, Finlandia e Países Baixos). Tamén 11 mobilidades de formación de persoal docente. O programa, que comezou no ano 2015, permitiu xa a realización de preto de 420 mobilidades de alumnado e de 20 de persoal docente. O investimento acumulado nesta iniciativa alcanza xa preto de cinco millóns de euros, dos que 820.105 € foron fondos propios da Deputación e os restantes, 4.174.403, achegados polo Servizo Español para a Internacionalización da Educación (SEPIE) do Ministerio de Industria.