As Neves transformará a biblioteca municipal cun investimento de 35.000 € do Plan Concellos 2017
A institución provincial leva entregado preto do 79 % do total destinado ás Neves dentro do plan, cun investimento situado en máis de 420.000 euros
A Deputación de Pontevedra acaba de aprobar, a través dunha Resolución presidencial, unha nova achega ao Concello das Neves no marco do Plan Concellos 2017, dentro da súa liña 1 de Investimentos. Así, coa axuda valorada en 35.237,37 euros, As Neves poderá transformar a biblioteca municipal nun espazo activo de participación e de creación.
Ao abeiro do Plan Concellos 2017, anteriormente a institución provincial xa destinara ás Neves 239.293,56 euros en liña 1 para proxectos como a mellora da pavimentación de camiños nas trece parroquias que compoñen o concello, outro de mellora de eficiencia enerxética e das medidas de seguridade nos cadros do alumeado público de todo o concello, a instalación de sinais informativas e melloras nas comunicacións do cadro da estación de tratamento de augas potables e unha interconexión entre os distintos depósitos de auga que a conforman. Ademais, outros 33.563,47 euros en liña 2 destinados ao financiamento dun proxecto de posta en valor dos recursos turísticos da l0ocalidade, da Feira do Requeixo e do Mel, da Festa do Viño Tinto e para diversos gastos correntes e, por último, 112.296,81 euros en liña 3 cos que As Neves puido contratar a 16 persoas que están a desenvolver as súas profesións nos distintos servizos municipais da localidade.
Coa suma desta nova achega, As Neves xa ten recibido da Deputación de Pontevedra o 79,1 % do total do investimento que lle corresponde dentro do Plan Concellos 2017, isto é, 420.391,31 euros dun total de máis de 530.000 euros.