A sede da Deputación acolle este xoves unha xornada informativa da UCGAL sobre as cláusulas chan
O obxectivo é atender dúbidas da cidadanía ante a recente sentenza do Tribunal de Xustiza da Unión Europea sobre a devolución dos importes cobrados indebidamente
Co título "Que podo facer ante unha cláusula chan?", técnicos da Unión de Consumidores de Galicia (UCGAL) ofrecerán este xoves 19 de xaneiro, ás 20:00 horas, unha charla informativa no salón de actos do primeiro andar do Edificio Administrativo da sede da Deputación de Pontevedra. O obxectivo desta actividade, de acceso libre e gratuíto ata completar aforo, é atender dúbidas da cidadanía sobre o impacto da recente sentenza do Tribunal de Xustiza da Unión Europea sobre a devolución dos importes cobrados indebidamente nos casos de cláusulas chan de hipotecas consideradas abusivas.
O número de consultas de persoas afectadas polas cláusulas chan relacionadas con esa sentenza aumentou desde que se coñeceu a decisión do tribunal, polo que a UCGAL está a desenvolver xornadas en toda Galicia sobre esta cuestión. A través destes eventos cada persoa asistente pode coñecer a situación concreta da súa hipoteca, se inclúe unha cláusula chan e se existe a posibilidade de recuperar o diñeiro pagado de máis ás entidades bancarias e de reclamar para que non se lle siga aplicando unha cláusula chan.
A colaboración entre a Deputación de Pontevedra e a UCGAL estenderase á realización dunha segunda xornada informativa en Vigo. Será o martes 7 de febreiro, ás 20:00 horas, na sede viguesa da Deputación.
