A partires das 18:30 horas de mañá xa se poderán retirar as entradas da Gala do Ano do Patrimonio
A billeteira do Auditorio de Cangas abrirá as 18:30 horas para cambiar os convites por unha entrada numerada e para recoller as reservas feitas por correo electrónico
Todas as persoas que reservaran entrada por correo electrónico ou recolleran un convite en papel para asistir á Gala do Ano do Patrimonio, poderán cambialas por unha entrada numerada na billeteira do Auditorio Municipal de Cangas a partires das 18:30 horas. As reservas que non se recollan e os convites que non se cambien antes das 19:30 h, media hora antes do comezo do espectáculo, serán postos a disposición do público ata esgotar butacas. Desde a apertura da billeteira ata a hora de comezo da gala, tamén está previsto que todas as persoas que o desexen poidan pasar polo fotocol realizado a partires da imaxe orixinal do cartel da gala, que fora deseñado por Luis Davila. Hai que lembrar que este fotocol, que xa fora utilizado con grande éxito durante o Culturgal, recrea nun espazo de preto de oito metros todo o escenario marítimo que protagoniza o cartel incluíndo elementos tridimensionais e unha intervención no corredor para simular a Costa da Vela e que o público poida interactuar e ‘navegar' cos personaxes do cartel.
Para as familias que desexen achegarse con nenos e nenas, lembramos que se habilitará un espazo infantil a cargo de Polo Correo do Vento, que realizará un contacontos e un obradoiro de debuxo ao redor da figura de Maruja Mallo, artista á que se lle dedicou este ano o Día das Artes Galegas. Poderán participar rapaces e rapazas maiores de 5 anos, cun máximo de 50 prazas. Para participar neste espazo pódese reservar con antelación a través do enderezo electrónico polocorreodovento@hotmail.com , ou directamente no auditorio xusto antes da gala.
A gala, que estará presentada pola actriz Isabel Risco, contemplará actuacións de regueifa, teatro e música relacionadas con diferentes aspectos patrimoniais. No eido musical, participarán Manuel Budiño, que cumpre o 20 aniversario do seu primeiro traballo Paralaia, que actuará con Mercedes Peón. Pola súa banda, a Coral Polifónica de Bueu ofrecerá un repertorio baseado na cultura mariñeira en colaboración con Xurxo Souto. Tamén no eido musical destacan o grupo Pelepau, unha formación que actualiza a tradición musical galega, e unha parella de regueifeiros, que ofrecerán unha demostración da arte da improvisación en verso. No eido das artes escénicas, as actuacións correrán a cargo de Teatro de Ningures que realizará unha pequena montaxe correspondente ao seu espectáculo baseado no desembarco turco; e de Rebeca Santos e compañía, cun espectáculo de altura que tomará como punto de referencia as lendas relacionadas co monte do Facho.
Sesión vermú
A gala incluirá un pase previo, concibida como unha sesión vermú, que correrá a cargo da agrupación musical ‘Os Modernos' e que terá lugar ás 12:30 horas no palco da música da alameda de Cangas. Trátase dunha actuación que chega tamén no marco do ciclo Música nos Palcos, co que se pretende recuperar a importancia que os palcos da música tiveron nas vilas e nas parroquias da provincia, dándolle visibilidade aos escenarios musicais tradicionais, recuperando o ambiente lúdico que lles é propio, e fomentando a música en galego. No caso concreto de Cangas, o palco sitúase no centro da Alameda e fora construído en 1926 grazas a unha doazón de José Féliz Soage Villarino, fillo de pescadores que emigrara a Arxentina.