A oficina "Smartpeme" de Ponteareas acolle seis obradoiros durante o mes de outubro
"SmartPeme" é un programa de asesoramento no ámbito das TIC da institución provincial destinado ás persoas emprendedoras e ás pemes da provincia
A oficina SmartPeme de Ponteareas acollerá durante todo o mes de outubro seis obradoiros ao abeiro do programa "SmartPeme" da Deputación. "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e de mozos e mozas autónomas.
A oficina de Ponteareas acollerá os seguintes obradoiros: o xoves 6 de outubro, "Como empregar Google e Google Apps for Business". O luns 10 será a quenda de "Fotografía os teus produtos ou servizos para as redes sociais". Ese venres, día 14, "Imos chamar á porta da túa clientela. Posicionamento SEO". O martes 18 desenvolverase o obradoiro "Deseña sinxelamente imaxes abraiantes e profesionais". Dous días despois, o xoves 20, "Facebook Ads" e, por último, "A túa páxina web con WordPress" o mércores 26 de outubro. A oficina SmartPeme de Ponteareas, no Centro de Desenvolvemento Local, atópase en Lomba do Cruceiro, nº 5. Todas as actividades terán lugar en horario de 19:00 horas e o teléfono de inscrición é o seguinte: 886 20 20 20.
Lembramos que o novo proxecto SmartPeme, en palabras da Presidenta da Deputación na presentación do proxecto aos concellos celebrada a finais do pasado mes de xuño, "é un novo modelo de servizo orientado á mellora competitiva das pemes e á procura dunha melloría nas vendas e na eficacia e eficiencia das tarefas, que abre novos campos de actuación e alcanza novos grupos de interese coma os emprendedores, as asociacións empresariais e os axentes de dinamización en concellos". Para isto, nas oficinas de SmartPeme no Porriño, Cambados, Pontevedra, Lalín, Ponteareas e Vigo se están a pór en marcha as seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as pemes e, tamén, impulso de novas carteiras de servizos de asesoramento.
