A ‘Facultade da Compostaxe' iniciará o curso coa nova promoción de mestres composteiros o vindeiro 3 de abril
O vicepresidente Mosquera sinalou a variedade e alto nivel do profesorado do curso de formación dos bolseiros do Plan Revitaliza da Deputación
A ‘Facultade da Compostaxe' iniciará mañá 3 de abril o curso coa nova promoción de mestras e mestres composteiros. A xornada de formación comezará ás 15.30 horas co relatorio de varios conferenciantes, e contará cun acto de inauguración oficial ás 18.00 horas no que estarán presentes a presidenta da Deputación Carmela Silva, o vicepresidente César Mosquera, e representantes da Universidade de Vigo. Así mesmo, o contido virá da man da subdirectora xeral adxunta de Residuos da Secretaría de Estado de Medio Ambiente (Ministerio de Agricultura, Alimentación e Medio Ambiente), e o consultor e investigador da empresa ENT de Barcelona.
O curso de formación está dividido en cinco módulos a desenvolver en cinco semanas. O primeiro trata dos aspectos normativos e lexislativos relativos ao medio ambiente en xeral e aos residuos en particular (a súa prevención, reutilización, reciclaxe). Abranguerá tanto lexislación europea, como española e das comunidades autónomas (particularmente a galega), así como das normas de ámbito municipal (ordenanzas).
O módulo dous centrarase nos aspectos de tipo loxístico propios dos residuos urbanos, nas recollidas selectivas en xeral, pero moi especificamente na da materia orgánica fermentable. Abordaranse tanto aspectos técnicos e/ou tecnolóxicos como organizativos/económicos e serán estudados casos concretos reais actualmente en marcha.
No módulo tres abordaranse os diferentes modos de tratamento dos residuos urbanos de uso estendido para pasar xa a un estudio en profundidade dos aspectos científicos-técnicos específicos da compostaxe. Trataranse peculiaridades propias da compostaxe a pequena e moi pequena escala (de individual/familiar ata comunitaria/produtores singulares), chegando ata instalacións de tipo industrial. Dentro destas últimas centrarase o estudio nas de pequeno tamaño (< 3.000 t/a) que traballen sobre fracción orgánica selectiva na orixe.
O módulo catro consistirá nunha explicación exhaustiva e detallada do Plan Revitaliza da Deputación de Pontevedra e o cinco será de tipo totalmente práctico nos centros de compostaxe da Cidade Infantil Príncipe Felipe.
