A Escola Universitaria de Enfermería despide a etapa formativa de máis de 40 novas profesionais
O salón de plenos do Pazo provincial acolleu esta tarde o acto institucional de graduación da VI Promoción de Graduadas e Graduados en Enfermería
A Escola de Universitaria de Enfermería despediu esta tarde a etapa formativa dunha nova promoción, formada por 4 enfermeiros e 40 enfermeiras, que a partires de hoxe xa pasan a formar parte do mercado laboral. O acto institucional, ao que asistiu o equipo docente, o alumnado e familiares, estivo presidido pola presidenta da Deputación, Carmela Silva, e pola deputada e presidenta do Padroado da Escola de Enfermería, Eva Vilaverde, e contou coa participación do director, Miguel Ángel Piñón, e da subdirectora da Escola, Paz Diéguez, e do vicerreitor do Campus de Pontevedra, Jorge Genaro Soto Carballo. No nome do alumnado interveu a graduada Alba Ces Lafuente, mentres que a última lección do curso correu a cargo da graduada Marta Rey Cidre, quen expuxo o tema do seu Traballo de Fin de Grao Estigma da enfermidade mental na Escola Universitaria de Enfermería de Pontevedra.
Previo á imposición de becas e da entrega de diplomas, a presidenta da Deputación, ademais de parabenizar a todos e a todas as novas graduadas, abriu o acto referíndose ao seu labor profesional. "Nas vosas mans está a nosa saúde. Todas e todos vós sodes profesionais do coidado humano, tendes sido formadas e formados para garantir o benestar das persoas e tendes como meta común a súa atención, garantir a súa comodidade e tamén a súa esperanza", destacou Carmela Silva. Neste sentido, a presidenta reivindicou o papel clave das persoas profesionais da Enfermería para "que todas e todos teñamos unha vida digna e tamén unha morte. Unha morte sen sufrimento, sen dor, sen ter que escondernos. Unha morte digna e, neste aspecto, tamén tendes moito que facer e dicir". Carmela Silva finxo fincapé na necesidade dunha maior empatía e enxalzou o papel das e dos profesionais relativo ao coidado. "Como dicía Orem, os coidados teñen que ir da man da escoita activa das persoas, porque non todas queren o mesmo, e garantir que se respectan as vontades, a dignidade, a integridade e a liberdade de elección de todas as persoas", asegurou a presidenta.
Pola súa banda, a deputada e presidenta do Padroado da Escola Universitaria de Enfermería, Eva Vilaverde, puxo en valor a traxectoria da Escola asegurando que "o traballo docente que se realiza, cunha altísima calidade, permite formar as mellores profesionais, as máis preparadas do país, e as máis capacitadas para afrontar os retos que a sociedade actual nos presenta". Sobre estes retos, Eva Vilaverde indicou que "é moi posible que moitas de vós desenvolvades unha parte importante da vosa traxectoria en contornas familiares e privadas, en consonancia coas demandas que se veñen detectando nos últimos anos, pois a práctica da enfermería está chegando, cada vez en maior medida, aos nosos espazos privados e familiares, que son os nosos fogares." A presidenta do Padroado lembrou as singularidades da sociedade galega, sobre todo no relacionado co envellecemento da poboación, "o fai preciso profesionais orientadas ao coidado integral, ao benestar, á atención á dependencia, é a prevención".
Tanto Carmela Silva como Eva Vilaverde coincidiron en desexarlles "unha longa e ventureira traxectoria profesional" a todas as graduadas e graduados, ao tempo que as instaron a que "nunca esquezades os principios humanísticos que rexen a vosa profesión" lembrándolles que "ten moito de comunicación, de expresión verbal e non verbal, e de sostén imprescindible en momentos nos que as persoas atendidas se atopan, polo xeral, en situacións de vulnerabilidade".
