A Deputación revalida o punto de atención de "SmartPeme" na Estrada para apoiar a promoción empresarial e o emprendemento na vila
Na súa aposta por capacitar tecnoloxicamente as empresas e impulsar a súa competitividade, a institución provincial renova o convenio para continuar ofrecendo os servizos de "SmartPeme" no Viveiro de Empresas ata febreiro de 2022
A Deputación revalida o seu compromiso coa promoción empresarial e o emprendemento na Estrada ampliando ata febreiro do 2022 o punto de atención de "SmartPeme", situado na vila desde o 2018. Mediante este espazo, que ocupa unha oficina no Viveiro de Empresas da vila, a institución provincial continuará prestándolles asesoramento ás empresas, pemes e persoas autónomas, ademais de organizar obradoiros de capacitación e mellora da competitividade empresarial para impulsar o crecemento económico no contorno.
A través do punto de atención de "SmartPeme" na Estrada a Deputación de Pontevedra pretende poñer á disposición das empresas, pemes e persoas autónomas un conxunto de recursos que lles faciliten unha mellor utilización dos servizos tecnolóxicos, así como fomentar o traballo en rede entre os distintos axentes do territorio, constituíndose tamén como punto de encontro de empresas. "Para o impulso do crecemento económico é preciso mellorar a competitividade das nosas empresas", asegurou Carmela Silva, quen informou que a través de "SmartPeme" estase a difundir coñecemento e información de xeito personalizado, con asesoramentos e obradoiros de capacitación en materia de tecnoloxías da información e comunicación e realizando accións de acompañamento tecnolóxico de xeito presencial, virtual ou telefónico.
A oficina de "SmartPeme" na Estrada está aberta no Viveiro de Empresas do municipio o primeiro e o último mércores de cada mes, en horario de mañá (de 10 a 14.30 horas) e de tarde (de 16 a 19 horas). Desde a súa posta en marcha, ademais da atención no punto informativo, estase a realizar un obradoiro formativo mensual dirixido ás persoas emprendedoras, autónomas e pemes. Deste xeito, prestáronse xa máis de de 111 asesoramentos personalizados a 23 persoas autónomas, persoas emprendedoras e pemes do concello da Estrada e organizáronse 13 obradoiros formativos en materia de tecnoloxía dentro do ámbito empresarial.
