A Deputación mellorará a seguranza viaria na contorna do colexio Neira Vilas en Peitieiros
O deputado provincial de Mobilidade, Uxío Benítez, e o alcalde de Gondomar, Francisco Ferreira, mantiveron esta mañá unha xuntanza para abordar as prioridades deste concello en materia de Moblidade
O deputado provincial de Mobilidade, Uxío Benítez, e o alcalde de Gondomar, Francisco Ferreira, mantiveron esta mañá unha xuntanza para abordar as prioridades deste concello en materia de Mobilidade. Entre os acordos máis salientables da reunión está o compromiso da Deputación para estudar tecnicamente a mellora da seguranza viaria na estrada provincial EP-2301, que vai de Gondomar a Peitieiros, na contorna do colexio público Neira Vilas. O obxectivo desta actuación é o de propor actuacións de mobilidade que garantan a seguranza viaria, prioritariamente para o alumnado e para os e as usuarias do centro educativo. O estudo tamén atenderá aos servizos e equipamentos pertinentes, como a ubicación máis acaída para a parada dos autobuses escolares en relación aos accesos ao recinto. O proxecto, ademais de aumentar a seguranza tanto para as persoas usuarias do colexio como para a veciñanza da zona, tamén se enmarca no obxectivo de promover a racionalización dos espazos públicos, atender ás necesidades dos colectivos máis vulnerables e, sobre todo, priorizar a mobilidade peonil e racionalizar a convivencia entre persoas e vehículos de xeito seguro.
Na xuntanza, o rexedor tamén lle entregou ao deputado a memoria do anteproxecto de humanización da interconexión das rúas urbanas San Bieito e Emigrante coas estradas provinciais EP 2301 Gondomar- Peitieiros, e a EP 2302 Gondomar- Chaín- Morgadanes. O alcalde comprometeuse a achegar o proxecto nas vindeiras semanas para que poida ser revisado polos técnicos provinciais, atendendo aos criterios e á estratexia de Mobilidade sostible da Deputación provincial. Unha vez realizado este proceso, ambas Administracións establecerán o marco de colaboración para acometer as actuacións contempladas.
Por último, tanto Benítez como Ferreira aproveitaron o encontro para revisar as solicitudes que o concello de Gondomar fixera no seu momento ao abeiro do Plan MOVESE, nas que se contemplan medidas de calmado do tráfico tales como a instalación de pasos de peóns sobreelevados, redutores físicos de velocidade e zonas 30 nas vías de titularidade provincial.
