A Deputación de Pontevedra leva o saneamento a unha ducia de lugares de Valga e financia a pavimentación de máis de 15 km de camiños municipais
Os cinco grandes proxectos de saneamento acometidos nos últimos anos supoñen xa un investimento acumulado de 1,5 millóns de euros
A veciñanza do rural de Valga goza de novas redes de saneamento e accesos mellorados gracias ao investimento conxunto de preto de 635.000 euros por parte do Plan Concellos da Deputación de Pontevedra. Os deputados provinciais Gregorio Agís e Manuel González visitaron as obras acompañados do tenente de alcalde, Román Castro.
As obras de saneamento, cun custo de 335.000 euros, habilitaron diversos ramais que totalizan case 3 Km de canalizacións nos núcleos de Balleas-Socastro, Outeiriño-Baño-Carballiño-Sixto, Chenlo-Ponte Valga, Raxoi, Bronllo-Cernadas e Vilar-Cernadas. Ao mesmo tempo construíronse dúas novas minidepuradoras de augas residuais en Cernadas, con capacidade para 450 habitantes e Raxoi, con capacidade para outros 200. A maiores, realizáronse as pavimentacións de 15 Km camiños rurais en Campaña, Montiño, Tarroeira, Parafita, Louro-Senín, Areal-Outeiro, Casal de Eirigo, Outeiro, A Devesa, O Coto, Cedelo, Fontelo, Cimadevila, Casa de Amil, Baño, O Carballiño, Castiñeiras e Moldes-Vilarello, no Forno, por un importe doutros 300.000 euros. Ámbalas dúas actuacións foron executadas pola empresa Covsa.
Gregorio Agís, deputado de Infraestruturas, destacou o apoio constante da Deputación ao Concello de Valga "dando resposta ás necesidades da veciñanza". Tras poñer en valor a estrea dun saneamento e unhas pavimentacións que fan chegar estes servizos a unha parte significativa do concello destacou que a vontade institucional é "seguir colaborando". Deste xeito, lembrou que hai dúas obras nas estradas provinciais que agardan pola cesión de terreos por parte do Concello, como son a ampliación e drenaxe da EP-8504 (Forno-Cernadas) e a mellora da seguridade viaria na EP-8501 (Valga-Martores), unhas actuacións valoradas conxuntamente en case 575.000 euros. O primeiro tenente de alcalde e concelleiro de Obras e Urbanismo, Román Castro, ofreceu "colaboración total" coa Deputación e destacou que estas dúas obras afectan a "importantes vías de comunicación", polo que confía en que as cesións "vaian para adiante". "Estamos rematando o tema", concluíu.
O tenente de alcalde tamén destacou a mellora que están a supoñer as obras de saneamento que impulsa a Deputación nun concello moi rural, con amplas distancias entre os núcleos de poboación, polo que, explicou, a solución a base de pequenas depuradoras resulta moi funcional.
Gregorio Agís lembrou que coas obras obxecto da visita de hoxe, a Deputación culmina o quinto proxecto de saneamento en Valga, onde van investidos en torno a 1,5 millóns de euros tan só en saneamentos desde o arranque do Plan Concellos no ano 2016. Deste xeito, dotouse deste servizo aos núcleos de Casal de Eirigo, Meadela, Canle, Cotriños, Carracido, Martores e Seixa, así como diversos colectores xerais do concello de Valga. Outro tanto comentou a propósito das obras de pavimentacións de camiños rurais, aspecto no que a Deputación xa acometeu obras cun importe acumulado de 750.000 euros na localidade.
Máis de 6 millóns de euros investidos en Valga
En total, a Deputación de Pontevedra leva investidos preto de 6 millóns de euros no Concello de Valga desde o ano 2015. Con cargo ao Plan Concellos, este mesmo ano está a xestionar 553.533 euros. Este plan permitiu a execución de 13 obras. A maiores, o departamento provincial de Infraestruturas realizou obras por valor de 1,7 millóns de euros nas estradas provinciais ao seu paso por Valga. A última actuación, cun importe próximo aos 150.000 euros, foi a drenaxe transversal na EP-8501 Valga-Martores, unha das dúas vías que se pretende ampliar e que está pendente por mor da cesión dos terreos afectados.