A Deputación inicia o programa "Nadal en galego" en Mondariz
Cun espectáculo infantil, dirixido a nenos e nenas a partir de 3 anos, que terá lugar mañá, ás 17:30 horas, no Centro Social
Por que é salgada a auga do mar? é o título da obra teatral infantil que mañá, martes día 8, ás 17:30 horas, se desenvolverá no Centro Social e Cultural de Mondariz. Trátase dun espectáculo que se enmarca no programa "Nadal en galego", que promove a Deputación de Pontevedra. "Un programa que se inicia en Mondariz e que levará a varios concellos da provincia unha serie de espectáculos para público familiar, para que nestas datas tan significativas, sobre todo para os e as máis cativas, tamén se poida gozar dunha oferta cultural na que o noso idioma estea presente", sinalou o deputado provincial de Cultura e Normalización Lingüística, Xosé Leal.
Por que é salgada a auga do mar? é unha obra da compañía especializada en teatro infantil Os Quinquilláns, que leva representando esta peza por todas a comarcas de Galicia desde o verán do ano pasado. Trátase dunha historia protagonizada por dous personaxes que conseguen introducir os máis pequenos e pequenas na propia liña argumental, facéndoos participar activamente no desenvolvemento da trama.
Grazas á Tripulanta Rías Baixas e ao Tripulante Norai, que discuten sobre a orixe salgada da auga do mar, os rapaces e as rapazas coñecerán unha lenda tradicional e o fondo submarino, para o que serán dotados cun atrezzo básico por parte dos propios actores, para poder acompañalos polos percorridos que se lles propoñen. Trátase dun espectáculo, dunha hora de duración, que xoga coa controversia entre as crenzas populares e os estudos científicos de xeito ameno e lúdico. Está dirixido a todos os públicos, pero a compañía recomenda que os cativos e as cativas sexan maiores de 3 anos.
