A Deputación de Pontevedra formaliza a compra de importante material xenético cara ao Plan de mellora da cabana gandeira da provincia
Mouriscade xa traballa con tres das empresas máis potentes do mundo e a Comisión de Expertos decidiu novos investimentos para adquirir máis embrións con estes elevados índices de calidade
Novo paso adiante no ambicioso Plan de reactivación da finca Mouriscade que a Deputación de Pontevedra está a desenvolver na finca de Deza. Na reunión que tivo lugar nas últimas horas da Comisión de Expertos, integrada por persoal técnico o representantes do sector gandeiro da provincia, confirmouse a compra de material xenético de altísima calidade destinado ao programa mellora da cabana gandeira da provincia, obxectivo prioritario do plan.
Trátase de tres novos contratos con empresas nacionais e internacionais, Embriomarket, S. L., Xenética Fontao e Semex España, provedoras da mellor xenética da raza frisoa, que supoñen a adquisición de embrións con índices de calidade, dos máis altos do mundo. De feito, os primeiros embrións chegados a Mouriscade xa foron transferidos a animais da granxa. Esta operación permite á Deputación de Pontevedra a poñer á disposición do sector gandeiro da provincia material xenético procedente de animais de "elite mundial", un programa de investimento que terá unha segunda compra tal e como decidiu a comisión e da que se informará na vindeira reunión das alcaldesas e alcaldes da comarca.
Ase mesmo, tamén se informou das últimas novidades implementadas na granxa para a mellora do benestar animal, que permitiron unha significativa redución do nivel de células somáticas entre as reses. Se trata de probas preliminares que están a arroxar interesantes datos que poderán ser exportables ao resto de ganderías o que permitirá unha mellora importante e significativa da cabana provincial.
Datos laboratorio
Na Comisión de Expertos tamén deuse conta dos datos de analíticas realizadas no laboratorio de Mouriscade no ano 2020 que ascenderon a 73.610 mostras procedentes de diferentes puntos do Estado e de Europa.
Do conxunto de mostras analizadas 30.629 pasaron polo laboratorio de Mouriscade para a análise de químicos, 18.450 para determinacións microbiolóxicas e 26.499 para análises mediante a técnica quimiométrica NIR. No que respecta á natureza das mostras analizadas durante o ano pasado, a maior parte delas, un 37 % das recibidas, foron ensilados de herba e millo, racións unifeed e forraxes. Ademais, un 23 % foron pensos e mesturas e un 14 % mostras de leite para determinacións microbiolóxicas. O resto das mostras analizadas correspóndese con materias primas, entre as que destacan a soia, o millo ou o trigo, e diferentes tipos de produtos nutricionais empregados en alimentación animal.
A Deputación de Pontevedra bonifica a aquelas analíticas procedentes de ganderías, o que supuxo un aforro de 75.255 euros ás gandeiras e gandeiros da provincia. Do total das mostras recibidas 12.518 chegaron a Mouriscade de gandeiras e gandeiros da provincia suxeitos a bonificación, delas 2.209 foron mostras de ensilados e o resto, 10.309, de leite.