A Deputación de Pontevedra destina un 20,5 % máis de recursos para o fomento do emprego
Fronte á política de recortes e ao descenso de investimentos en políticas de emprego do Goberno central, o novo Goberno da Deputación de Pontevedra cumpre cos compromisos adquiridos na toma de posesión investindo 15,3 millóns de euros no fomento do emprego
Un obxectivo prioritario para o novo goberno da Deputación de Pontevedra é o emprego. Así, a presidenta da institución provincial, Carmela Silva, no seu discurso de investidura destacaba que o novo goberno loitaría contra o desemprego para converter a provincia de Pontevedra nun territorio próspero, planificando estratexias de desenvolvemento coa finalidade de fomentar o progreso económico e social. Esta declaración de intencións da presidenta na súa toma de investidura convértese en realidade no orzamento da Deputación de Pontevedra para 2016, que destina un 20,5 % máis de recursos económicos a fomentar o emprego na provincia.
Entre 2011 e 2016 os recursos destinados a emprego do Goberno de España diminuíron en 15.100 millóns de euros e, no mesmo período, o orzamento destinado a mellorar a empregabilidade e a facilitar o acceso ao emprego para os nosos parados recortouse nun 31 %. O noso país é máis pobre que hai catro anos, con máis paro e parados sen axuda pública que hai catro anos, e ante estes datos a resposta do Goberno central foi formular para 2016 uns orzamentos que dan as costas aos máis vulnerables da sociedade. Así, mentres as estratexias do Goberno central e da Xunta de Galicia pasan polos recortes que levaron a que no noso país teñamos medio millón menos de ocupados, que a poboación activa se recortase en 600.000 persoas, que nove de cada dez contratos sexan temporais e que o 25 % dure menos de 2 meses, que os parados sen cobertura de desemprego sexan xa máis de 3,7 millóns e que 1,5 millóns de familias teñan a todos os seus membros en paro, a Deputación de Pontevedra aposta por aumentar nun 20,5 % e investir máis recursos para destinar ao fomento do emprego e impulso da formación como factor para o aumento da empregabilidade.
Esta aposta xa se comezou a materializar coa posta en marcha dun departamento propio denominado Servizo de Promoción de Emprego e Desenvolvemento Local, ata o momento inexistente, cuns fins diferentes ó Servizo de Recursos Humanos e Formación. Este departamento aglutina accións de formación e inserción/integración sociolaboral coa finalidade de paliar as necesidades das persoas máis vulnerables, tratando de eliminar a precariedade laboral e impulsando o traballo de calidade, que respecte os traballadores e garanta unhas dignas condicións económicas. Pero o servizo tamén está a impulsar as prácticas laborais e as axudas para a creación de empresas, dando un forte apoio á formación e incorporación cualificada ao mercado de traballo. Así, a través deste servizo xa se puxeron en marcha iniciativas coma o Depoemprega 2015, iniciado o paso mes de outubro, que ten por obxectivo mellorar a empregabilidade e acadar a inserción laboral dos seus participantes, o Practicum Depo 2015, que impulsa as prácticas laborais no estranxeiro, ou obradoiros de emprego dirixidos a mozas e mozos menores de 25 anos.
O novo Servizo de Promoción de Emprego e Desenvolvemento Local terá, en 2016, un orzamento de preto de 4 millóns de euros que se complementarán cos preto de 3 millóns de euros que o novo Goberno da Deputación de Pontevedra destinará ao Servizo de Recursos Humanos e Formación. Así, as dúas partidas destes centros xestores de fomento e promoción do emprego suman preto de 7 millóns de euros no orzamento provincial de 2016, aos que, ademais, é necesario engadir os 9 millóns de euros destinados ao fomento do emprego nos concellos da provincia.
Polo tanto, a Deputación de Pontevedra destina, no novo orzamento, un total de 15,3 millóns de euros para o fomento do emprego (o 10 % do gasto) e da formación como instrumento máis eficaz para impulsar a empregabilidade. En resumo, destinarase para 2016 un 20,5 % máis de recursos que os destinados para 2015, cando o investimento en fomento de emprego era de 12,7 millóns de euros.
Durante 2016 a Deputación de Pontevedra contempla outorgarlles axudas aos investigadores e innovadores e contribuír nas bolsas das e dos estudantes universitarios dos campus de Pontevedra e Vigo, para que todas e todos teñan acceso ás estancias noutros países de Europa durante un curso en igualdade de condicións. Tamén se impulsará un protocolo de actuacións para os vindeiros catro anos, coa Universidade de Vigo, coa finalidade de traballar conxuntamente compartindo experiencias e coñecemento.
